Umushumba wa Diyosezi ya Kabgayi, Musenyeri Samaragde Mbonyintege, yibukije Mutabazi wahawe Ubusaseridoti, ko umuhamagaro we ari ukumva ijambo ry’Imana, akaryakira mu mutima rikamuhindura, rikamukwizamo ibakwe ryo kurishyikiriza abandi.

Naho kuba umudiyakoni ngo ni umurimo wo kuba umugaragu wa Yezu Kristu. Uyu murimo na wo abawukora bakaba bagendera ku masezerano yo kudasha. Nyuma yo gusomerwa ibyo bagomba kubahiriza mu murimo w’Imana biyemeje kwiyegurira, Padiri Fideli n’abadiyakoni bemeye kubyubahiriza byose no kumvira Musenyeri Mbonyintege n’abazamusimbura.

Mutabazi Fideli, wabaye Padiri, avuga ko yabiharaniye igihe kitari gito none umunsi ukaba ugeze. Arashimira Imana yamuhaye kugera ku byifuzo bye. Yagize ati “Ndashimira Imana itatugaya ubuto n’ubuke maze ikaduha kugira uruhare ku mabanga ya yo. Ikaduha kugira uruhare ku busaseridoti bwa Kristu yageneye umukiro w’umuryango wayo”.

Umuyobozi wungirije w’akarere ka Kamonyi, Uwera Marie Alice, yashimye uruhare Kiliziya Gaturika igira mu guteza imbere abaturage cyane cyane mu mashuri, mu buzima no mu gufasha abatishoboye. Ngo asanga kongera abakozi muri Kiliziya ari ugufasha ibikorwa kwiyongera no kurushaho gutanga umusaruro ushimishije.

Mu gihe cy’imyaka ibiri Diyosezi ya Kabgayi yiteguye kubona abapadiri bashya batandatu, ariko Musenyeri avuga ko bagikeneye abandi kuko hakiri amaparuwasi afite abapadiri bake. Ku bw’iyo mpamvu yasabye abakristu gukomeza kwishakamo abiyegurira Imana.

Marie Josee Uwiringira