Amajyaruguru: Tumwe mu dushya twaranze Umuganura (Amafoto)

Kimwe n’ahandi mu gihugu, mu Mirenge yose igize Intara y’Amajyaruguru, ku wa Gatanu tariki 05 Kanama 2022, hizihijwe umunsi w’Umuganura; uyu ukaba ari umunsi, uba buri wa Gatanu w’icyumweru cya mbere cy’ukwezi kwa Kanama.

Buri mwaka, mu Rwanda, Umunsi w’Umuganura, wizihizwa mu rwego rwo kwishimira no gusangira umusaruro wabonetse. Hirya no hino mu Turere tugize Intara y’Amajyaruguru, abayobozi n’abaturage, bifatanyije kwizihiza uyu munsi, mu birori byari bibereye ijisho, uyu ukaba wabaye umwanya wo kurushaho kuzirikana umurage w’abakurambere, bishimira ibimaze kugerwaho, ndetse banarebera hamwe ingamba bashyiramo imbaraga, mu rwego rwo kurushaho kunoza no kongera umusaruro.

Muri iyi nkuru, turagaruka ku dushya twaranze ibirori byo kwizihiza uyu munsi, mu Turere tw’Intara y’Amajyaruguru.

RULINDO:

Ni na ho, umunsi w’Umuganura wizihirijwe ku rwego rw’Igihugu. Minisitiri w’Intebe, Dr Edouard Ngirente, yifatanyije n’abaturage mu birori byo kwizihiza uyu munsi, byabereye mu Murenge wa Rusiga ahazwi nko ku “Kirenge cya Ruganzu”

Muri ibi birori, wabaye umwanya wo kumurika ibyagezweho muri aka Karere ka Rulindo, habaho igikorwa cyo kuganuza abaturage, aho by’umwihariko abana bahawe amata, ndetse imiryango umunani yorozwa inka za kijyambere.

Wabaye umwanya wo kumurika ibikorerwa mu Karere ka Rulindo
Wabaye umwanya wo kumurika ibikorerwa mu Karere ka Rulindo
Abitabiriye ibirori byo kwizihiza umunsi w
Abitabiriye ibirori byo kwizihiza umunsi w’umuganura, mu Karere ka Rulindo, basusurukijwe n’Itorero ry’Igihugu Urukerereza n’abandi bahanzi batandukanye

Minisitiri w’Intebe Dr Edouard Ngirente, yashishikarije abaturage kwirinda ubunebwe, baharanira gukora cyane, kugira ngo babashe kongera ingano y’umusaruro beza buri uko igihembwe cy’ihinga gitashye.

Minisitiri w
Minisitiri w’Intebe Dr Edouard Ngirente, yahamagariye abaturage gushishikarira umurimo, bakirinda kunebwa kugira ngo bazabashe kongera ingano y’ibyo beza

MUSANZE:

Ku rwego rw’Akarere ka Musanze, umunsi w’Umuganura, wizihirijwe mu Murenge wa Kimonyi, aho abayobozi ku rwego rw’aka Karere, bifatanyije mu busabane n’abaturage. Abo bayobozi bafatanyije n’abaturage guteka amafunguro mu buryo bwa gakondo, ndetse barangije kuyahisha barayasangira.

Umuyobozi wungirije ushinzwe Iterambere ry
Umuyobozi wungirije ushinzwe Iterambere ry’Ubukungu mu Karere ka Musanze, Andrew Rucyahana Mpuhwe, yagaragaye afatanya n’abaturage mu guteka umutsima w’amasaka

Wabaye n’umwanya ku baturage wo kumurika umusaruro bejeje, basobanurirwa amateka n’akamaro k’umunsi w’umuganura. Amafunguro abitabiriye ibi birori basangiye, yari agizwe n’umutsima w’amasaka, ibigori, ibihaza, ibishyimbo, amashaza, igitoki n’andi ateguwe mu buryo bwa gakondo

Mu Karere ka Musanze abayobozi n
Mu Karere ka Musanze abayobozi n’abaturage baganuye ku musaruro bejeje
Abaturage bamuritse umusaruro bejeje baboneraho no kuganuza bagenzi babo
Abaturage bamuritse umusaruro bejeje baboneraho no kuganuza bagenzi babo

BURERA:

Ibirori byo kwizihiza umunsi w’umuganura mu Karere ka Burera byabereye mu Murenge wa Rwerere. Abaturage bibukijwe ko imwe mu ntwaro yatuma barushaho kongera umusaruro, harimo no kurwanya isuri mu mirima yabo, kandi bakitabira ubuhinzi bwa kijyambere.

Umuyobozi w’Akarere ka Burera wungirije ushinzwe iterambere n’Ubukungu, Nshimiyimana Jean, hamwe n’abandi bayobozi mu nzego zirimo n’izishinzwe umutekano, basabye abaturage kunoza ingamba zirimo guhingira igihe, gukoresha ifumbire y’imborera n’imvaruganda, gutera ibihingwa imiti no kujya babikurikiranira hafi kugeza babonye umusaruro.

Abaturage bamuritse umusaruro baranaganuzanya
Abaturage bamuritse umusaruro baranaganuzanya

Umusaruro wiganjemo ibigizwe n’ibigori, ibishyimbo, amasaka biri mu byo abitabiriye umunsi w’umuganura bamuritse.

Abaturage bo muri Burera uduseke bari batwujujemo umusaruro bejeje
Abaturage bo muri Burera uduseke bari batwujujemo umusaruro bejeje
Bwari ubusabane mu kwizihiza umunsi w
Bwari ubusabane mu kwizihiza umunsi w’umuganura i Burera

GAKENKE:

Mu Murenge wa Ruli aho ibirori byo kwizihiza umunsi w’Umuganura byabereye ku rwego rw’aka Karere, abaturage n’ubuyobozi, na bo basangiye ku musaruro bejeje. Wabaye n’umwanya wo kwibukiranya ko umuganura w’ubu n’uw’igihe kizaza, ukwiye gukorwa mu buryo budasiga inyuma ubumwe bw’Abanyarwanda no gukunda umurimo, kugira ngo bazarusheho kugera ku byiza byinshi.

Abaturage bishimiye gusangirira hamwe umusaruro bejeje
Abaturage bishimiye gusangirira hamwe umusaruro bejeje
Abayobozi ku rwego rw
Abayobozi ku rwego rw’Akarere ka Gakenke bafatanyije gukata umutsima w’amasaka mu rwego rwo kurushaho kwishimira umusaruro bejeje
Abaturage n
Abaturage n’abayobozi basangiye amafunguro ateguwe mu buryo bwa gakondo

GICUMBI:

Abitabiriye ibirori byo kwizihiza umunsi w’umuganura basangiye ibiribwa harimo umutsima w’ingano, ibijumba, ibirayi, ibihaza, ibishyimbo, imboga n’ibindi bitandukanye.

Ibiribwa bitandukanye byari byateguwe ku bwinshi, uba umwanya wo kubisangira mu kwishimira uyu munsi w
Ibiribwa bitandukanye byari byateguwe ku bwinshi, uba umwanya wo kubisangira mu kwishimira uyu munsi w’umuganura muri Gicumbi
Abayobozi bitabiriye ibi birori mu Karere ka Gicumbi, banaboneyeho kugaburira abana bato mu rwego rwo kwibutsa abaturage ko bafite inshingano zo kurera neza abana babo
Abayobozi bitabiriye ibi birori mu Karere ka Gicumbi, banaboneyeho kugaburira abana bato mu rwego rwo kwibutsa abaturage ko bafite inshingano zo kurera neza abana babo

Muri ibi birori, abaturage banasabwe kwita ku bworozi bw’inka zitanga umukamo uhagije, mu rwego rwo guhangana n’ikibazo cy’imirire mibi n’igwingira mu bana.

Abaturage basabanye binyuze mu mbyino, zari zikubiyemo ubutumwa bushimangira insanganyamatsiko y’Umunsi w’Umuganura igira iti: “Umuganura, isoko y’ubumwe n’ishingiro ryo kwigira”.

Ibirori by
Ibirori by’umuganura byaranzwe n’imbyino zitandukanye

kigalitoday android app mobile

Ibitekerezo   ( 3 )

Twishimiye uriya munsi w’umuganura byumwihariko waranzwe nubusabane muburyo bwa gakondo kuburyo bunogeye ijisho😳

Tom yanditse ku itariki ya: 6-08-2022  →  Musubize

Twishimiye uriya munsi w’umuganura byumwihariko waranzwe nubusabane muburyo bwa gakondo kuburyo bunogeye ijisho😳

Tom yanditse ku itariki ya: 6-08-2022  →  Musubize

Twishimiye uriya munsi w’umuganura byumwihariko waranzwe nubusabane muburyo bwa gakondo kuburyo bunogeye ijisho😳

Tom yanditse ku itariki ya: 6-08-2022  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka