Ubusanzwe isengesho ryo kwa Yezu Nyirimuhwe riba buri cyumweru cya mbere cy’ukwezi. Iryo kuri iki cyumweru ryo ryahuriranye n’icyumweru cya mbere cy’ukwezi ndetse n’icyumweru cya mbere cy’umwaka wa 2015.

Nk’uko bisanzwe igihe cy’isengesho nyirizina ritangira mu masaha ya saa munani ari nawo mwanya abantu bose baba bategereje, niwo mwanya ababa bayoboye iki gikorwa kijyana no gushengerera batangaje abantu Imana yagiye ikiza mu ntangiriro z’uyu mwa, abasaga 25 bakaba aribo batangajwe ko bakijijwe indwara zitandukanye.

Zimwe mu ndwara zumvikanye, harimo abakijijwe SIDA, ibibyimba byo munda, ababonye urubyaro, abakize uburemba n’izindi.

Mukakamanzi Rugero Marceline aturuka muri Paruwase ya Kicukiro i Kigali, ni mwe mu bakirijwe mu rugo rwa Yezu Nyirimuhwe indwara ya Kanseri y’ibere ry’ibumoso.

Avuga ko mu mwaka 2012 aribwo yatangiye guhura n’ubu burwayi, abavandimwe bakamusaba kujya kwa muganga ariko bakanamubwira ko agomba kuzajya gusegera kwa Yezu Nyirimuhwe.

Ngo yivuje mu mavuriro atandukanye biranga harimo n’igihugu cy’Ubuhinde, aza gukirizwa kwa Yezu Nyirimpuhwe.

Buri cy’umweru cya mbere cy’ukwezi aha hantu hitabirwa n’abantu benshi baturutse hirya no hino mu gihugu, ndetse no mu bindi bihugu. Abenshi bakavuga ko bahasubirizwa ibibazo baba bahazanye.

Iri sengesho ribera kwa Yezu Nyirimpuhwe buri cyumweru cya mbere cy’ukwezi rikitabirwa n’abantu benshi, ryatangiye nyuma y’umwaka wa 1994 nyuma y’ibitangaza byagiye bihabera mu Jenoside aho abantu basaga 500 bahakirijwe baragombaga kwicwa.

Benshi bakemeza ko iyo bahaje bahakirizwa indwara zitandukanye, abandi bagasubizwa ibyifuzo baba baje bafite.

Eric Muvara