Marina na Bushali biyongereye mu bazitabira Iserukiramuco rya Iwacu Muzika

13-03-2026 - 21:40' | Ibitekerezo ( 1 )

Umuhanzikazi Marina Deborah wamenyekanye nka Marina ndetse n’Umuraperi Jean Paul Hagenimana uzwi cyane ku izina rya Bushali, byemejwe ko bazitabira bitaramo bizenguruka Igihugu bya MTN Iwacu Muzika Festival 2026.

Ibi bitaramo bizatangira ku wa 20 Kamena 2026 bikarangira ku wa 1 Kanama 2026, bizabera mu Mijyi ya Huye, Ngoma, Nyagatare, Muhanga, Musanze, Rubavu na Karongi igiye kwakira bwa mbere MTN Iwacu Muzika Festival.

Marina yavuze ko yiteguye neza gutanga ibyishimo ku bafana be cyane ko amaze iminsi yitegura ku buryo buhagije kugira ngo azabashe gutanga igitaramo gishimishije. Ati: “Nditeguye cyane gutaramira abafana n’abakunzi banjye muri rusange. Muri macye, abafana banyitege.”

Marina ni umwe mu bahanzi bitabiriye ibitaramo bya mbere bya Iwacu Muzika Festival byabaga ku nshuro ya mbere mu 2019 ndetse aza kongera yaherukaga kubigaragaramo mu 2021.

Mu bahanzi bamaze gutangazwa bazaririmba muri MTN Iwacu Muzika Festival 2026, harimo Kevin Kade wabaye uwa mbere gutangazwa, hakurikiraho Kenny Sol, mu gihe hategerejwe n’abandi bahanzi bazagenda bamenyekana mu minsi iri imbere.