Itangizwa ryemewe ndetse no gusinywa byateganyijwe muri iki cyumweru mu nama ya World Economic Forum i Davos, bikerekana intego y’isi yose hamwe n’inkunga ikomeye y’abayobozi b’ubukungu n’imiyoborere.

Nubwo iri shyirahamwe ryashinzwe mu buryo bworoshye kandi ryibanda ku musaruro, iyi gahunda yateje impungenge ko ishobora kuba ihanganye n’Umuryango w’Abibumbye, ikaba ishobora gusubiza inyuma uyu muryango umaze imyaka 80 mu bibazo mpuzamahanga.

Inama y’Amahoro igizwe n’abantu bakomeye mu bya politiki—Marco Rubio, Tony Blair, Jared Kushner—hamwe n’abayobozi b’amasosiyete y’ingenzi.

Iyi gahunda ishyirwa mu ntego z’ibyemezo by’Inama y’Umutekano y’Umuryango w’Abibumbye, ikazajya igenzura impinduka mu miyoborere ya Gaza, gusubizaho serivisi z’abaturage, no kurinda ituze.

Ariko, umushinga w’itegeko ryabaye ibanga, ugaragaza kunenga “ibigo byapfubye” nka UN kubera bureaucracy, kandi usaba ko Trump yagirwa Perezida w’Inama ubuzima bwe bwose, afite ububasha bwo kwanga ibyemezo(droit de veto), gushyiraho abayobozi, no kugenzura amafaranga.

Amafaranga $1 miliyari avugwa ko ashobora gusabwa mu kwinjira ku banyamuryango bahoraho yateje impungenge, kuko hari abatinya ko ibi byazajya mu nyungu za Amerika. Aha, ngo Trump arashaka ibihugu mirongo itandatu ku ikubitiro, ku buryo hari abatekereza ko gahunda ishobora kuzagenda ikagera no mu Burasirazuba bwo Hagati.

Iyi Nama y’Amahoro ishingiye ku kunengwa kw’igihe kirekire ku mikorere ya LONI, cyane cyane muri Afurika.

Urugero rushobora kuba urw’ingabo zoherejwe mu butumwa bw’Amahoro muri Repubulika Iharanira Demokarasi ya Congo (MONUSCO), washinzwe mu 1999 kandi ugahindurirwa izina mu 2010. Ni wo mushinga munini kandi uhenze kurusha indi yose yo kubungabunga amahoro ku isi, ukoresha arenga $8.7 miliyari kugeza ubu.

N’ubwo hari iyi nkunga, MONUSCO yakomeje kunengwa cyane kubera kudashobora kurinda abaturage mu gihe cy’uruhurirane rw’ubugizi bwa nabi, ubutumwa bujagaraye, kutanoza imikorere, ndetse no gukorana n’ingabo za Kongo zashinjwaga kugirira abaturage nabi.

Mu buryo busa n’ubu, Urukiko Mpuzamahanga Mpananaha rwashyiriweho u Rwanda (ICTR), rwashinzwe mu 1994, rwerekanye ubushobozi bwa UN mu butabera buhenze, butinda, kandi rimwe na rimwe budafatika.

Mu myaka irenga 20, rwaciriye imanza abantu 93 ku giciro cyose cya $2 miliyari, nubwo imanza zari nke ugereranyije n’ingaruka za jenoside. Buri rubanza rwagezaga kuri $20 miliyoni, bihagije gutera inkunga gahunda ya leta ikomeye hano.

N’ubwo rwashyizeho amategeko mashya—nko kwemeza gufata ku ngufu nk’icyaha cya jenoside—umusaruro mucye no gukoresha amafaranga y’umurengera byakomeje kunengwa cyane.

Nubwo hari izi mbogamizi, UN iracyafite akamaro muri Rwanda, itanga inkunga ikomeye mu iterambere n’ubutabazi.

Amafaranga atangwa buri mwaka na UN binyuze mu mashami nka UNICEF, WFP, UNDP, IOM, na WHO yageze kuri miliyoni z’amadolari, ashyigikira ubuzima, uburezi, imiyoborere, n’imishinga y’impunzi.

U Rwanda kandi ni kimwe mu bihugu byateye inkunga ibikorwa byo kubungabunga amahoro bya UN, yohereza hafi abasirikare 6,000 ku isi hose, bitanga inyungu z’amafaranga, ndetse bigateza imbere ijambo ry’igihugu mu ruhando mpuzamahanga.

Inama y’Amahoro ishobora guhungabanya izi nyungu. Mu gutanga uburyo bwihuse butegekwa n’Amerika bwo kuyobora ibintu byinshi, ishobora kugabanya uruhare rw’u Rwanda n’ubushobozi bwa UN mu bice by’amakimbirane.

Amafaranga atangwa ku basirikare bashinzwe amahoro ashobora kugabanuka, inkunga y’iterambere ikagabanuka, kandi icyubahiro cy’igihugu ku rwego mpuzamahanga gishobora kugerwaho n’ingaruka. Kunengwa n’Ubushinwa, Uburusiya, n’abafatanyabikorwa bagenda gahoro muri uyu mushinga nka Isiraheli nabyo birushaho gutuma uyu mushinga wa Trump ukomeza kugorana.

Gusa, itangizwa ry’iyi gahunda i Davos riragaragaza umugambi w’ingenzi wo gushyira Amerika ku ruhembe rw’ibikorwa by’amahoro n’umutekano ku isi, igahita yirengagiza inzira gakondo za UN.

Ku bwa UN, ndetse n’ibihugu nk’u Rwanda, umwaka wa 2026 ushobora kuba igihe cy’ingenzi: cyangwa amahirwe yo kuvugurura no gukomeza imikoranire mpuzamahanga cyangwa ikindi gihe cyo gusenyuka no kubura icyizere mu miyoborere y’isi.