Amakuru yatangajwe n’abaturage bo mu Murenge wa Mwendo avuga ko abantu batandatu ari bo bakomeretse, barimo batatu bakomeretse cyane ku buryo boherejwe ku bitaro bya Gitwe kuvurirwayo.

Umuturage wo mu Murenge wa Mwendo avuga ko induru zavuze mu masaha y’urukerera rwo ku wa Kabiri tariki 20 Gashyantare 2024, mu misozi ya Kanyarira n’aho begeranye ko hari abajura basahuye ibintu, bikavugwa ko aho i Kanyarira ari na ho ngo abateye i Mutara basize za moto batwayeho ibyo bibye.

Agira ati, “Twumvise ko mbere yo gutera i Mutara babanje gusiga moto zabo muri Kanyarira, noneho ibyo bibye bakabyikorera bakabitwara kuri izo moto kuko ntawabashije kubatangira, n’abanyerondo babigerageje babatemye”.

Akomeza avuga ko hari n’abacuruzi bamwe batemwe kuko abo bitwaje intwaro, binjiraga mu mazu batababarira abayarayemo bakabakubita, abandi bagerageje kubarwanya bakabatema, kugeza n’ubwo abanyerondo bahuye na bo, batabahagaritse kuko ngo abo bakoze urugomo n’ubujura bari benshi.

Umunyamakuru wa Kigali Today yagerageje kuvugisha inzego z’umutekano n’abayobozi b’Umurenge n’Akarere byabereyemo ariko ntibaboneka kuri telefone, igihe bagira icyo babivugaho tukaza kubibatangariza.