Amategeko areba buri muturage wese w’icyo gihugu n’undi wese ugituyemo, akaba agomba kubahirizwa na buri wese kandi ku buryo bungana.

Mbere y’uko tureba uko bigenda igihe itegeko rihuriranye n’umuco, ubusanzwe Igihugu kigizwe n’abantu n’ibintu. Amategeko agaragaza kandi akarinda uburenganzira bwa buri wese, akerekana inshingano za buri wese, akagenga imibanire y’abantu hagati ubwabo no hagati y’abaturage n’ubuyobozi.

Amategeko ashyirirwaho kubanisha abantu mu mahoro, kurinda akajagari mu gihugu, kurinda ubusugire bw’umuntu ku giti cye, kurinda ubusugire bw’igihugu, no kugena icyerekezo cy’iterambere ry’abagituye.

Kugira ngo ihame ryitwe itegeko nk’uko twari tumaze kubivugaho hejuru, rigomba kuba ryarashyizweho n’urwego rwa Leta rubifite mu nshingano kandi ryanditse. Turebe uko bikorwa mu gihugu cyacu.

Mu Rwanda dufite Inteko Ishinga Amategeko, igizwe n’intumwa za rubanda abaturage bitoreye, zihagarariye abaturage bose. Nirwo rwego rwa Leta rushyiraho amategeko kandi rubifite mu nshingano.

Umwunganizi mu mategeko Me Kayiranga Desire, twaganiriye yadusobanuriye ko buri wese aba agomba kwibona muri iri tegeko. Ati:”Abaturage bose bagomba kurwibonamo kandi bakumva ko itegeko risohotse mu nteko ishinga amategeko bishyiriyeho ari iryabo, bakaba bagomba kuryubahiriza ryose uko ryanditse kandi nta kurica ku ruhande”.

Me Kayiranga akomeza avuga ko iyo itegeko rimaze gutorwa n’Inteko rigashyirwaho umukono na Perezida wa Repubulika, risohoka mu igazeti ya Leta, rigahita ritangira gushyirwa mu bikorwa, unyuranyije naryo araharwa kuko atitwaza ko Atari arizi.
Iyo ritarasohoka mu igazeti ya Leta riba ritarandikwa bityo ntawavuga ko ari itegeko kuko abaturage batarizi.

Nta rundi rwego mu Rwanda rushyiraho amategeko, kandi n’iyo hagiyeho amabwiriza ashyizweho n’urwego urwo arirwo rwose rw’ubuyobozi, ayo mabwiriza agomba gushingira ku itegeko no kurishyira mu bikorwa.

Hari ubwo umuco uhurirana n’itegeko icyo gihe itegeko niryo ryubahirizwa.

Urugero: umuco w’idini ya Isilamu, ubemerera gushaka abagore bane(4) ariko amategeko mbonezamubano y’u Rwanda avuga ko umugabo agomba gushyingiranwa n’umugore umwe(1). Icyo gihe iyo bikozwe amategeko arengera umugore umwe wasezeranye mu irangamimerere n’abo bana bityo ugasanga hari aho abanda bagore n’abana uburenganzira bwabo butubahirijwe.

Ni yo mpamvu nta witwaza umuco iyo uwo muco unyuranije n’itegeko ryanditse.

Kugira ngo itegeko ryubahirizwe na buri wese, rigomba no guteganya ibihano ku barica iruhande.

Twabonye ko itegeko riberaho kurinda akajagari, kurinda ubusugire bwa muntu n’ubusugire bw’igihugu, kurinda ubusugire bw’umutungo bwite w’umuntu n’uhuriweho n’abantu ndetse n’uw’igihugu muri rusange (ibikorwa remezo, ibidukikije, n’ibindi….)Iyo hari uriciye kuruhande, undi nawe akaza agaca ku ruhande, ka kajagari kaba katangiye, bwa busugire ntibuba bugishobotse.

Ni yo mpamvu hagomba kubaho ibihano kugira ngo abaturage bagende mu cyerekezo kimwe, bubahane, bubahe n’ibitari ibyabo.

Abahanga bavuga ko Itegeko ritagira ibihano aba Atari itegeko kandi n’ibihano bidashingiye ku itegeko bitemewe.

Me Desire avuga kuri aya magambo ashimangira ko itegeko rigomba kuba rifite ibihano yagize ati: “Turabizi ko n’amategeko y’Imana ari amategeko, ndetse ni meza kandi urebye ni nayo shingingiro ry’andi mategeko. ariko kuko adateganya igihano cy’ako kanya, umuntu ayagendamo uko ashaka ngo azicuza, akagarurwa n’amategeko ya Leta”.

MENYA UMWANDITSI

Umukazana Germaine

Umunyamakuru

@ Umukazana11

Reba inkuru zose nanditse ( 649 )