Imirimo yo kubaka icyambu iragana ku musozo

Ni icyambu kigiye kuzura gitwaye miliyoni 7 z’Amadolari ya Amerika. Cyagombye kuba cyaruzuye mu mpera za 2021, ariko imirimo yaje gutinda bitewe n’icyorezo cya Covid-19.

Umuyobozi w’agateganyo w’Akarere ka Rubavu, Nzabonimpa Deogratias, atangaza ko kigiye kuzura kandi biteguye kucyakira kikazateza imbere ingendo zo mu mazi mu Karere ka Rubavu n’uturere duhahirana na ko.

Icyambu gifite ububiko n’aho gutunganyiriza amazi yakoreshejwe akongera agakoreshwa

Herzi Ahmed, umukozi w’ikigo cya SCET-TUNISIE kirimo kurangiza imirimo yo kubaka iki kigo avuga ko mu hantu 12 yubatse ibyambu, kuri iki cyambu cyo mu Rwanda ari ho hubatse ikiraro cyiza gikomeye kandi gitwaye ubuso buto, gifite ibikenerwa byose kuko kizaba kibungabunga ibidukikije.

Agira ati « iki cyambu gifite uburyo byo gutunganya amazi yakoreshejwe akongera agakoreshwa aho kujyanwa mu kiyaga, ni icyambu kizaba gifite ibyangombwa byose ku bagikoresha ndetse harindwa n’ibinyabuzima biri mu mazi. »

Icyambu cya Rubavu kizajya cyakira ibicuruzwa bibikwa mu bubiko bungana na metero kibe ibihumbi 8, kandi bukazajya bucungwa ku buryo bw’ikoranabuhanga mu kurinda umutekano w’ibihabikwa.

Ni icyambu kizaba gifite aho imodoka zihagarara, aho amato azana ibicuruzwa ahagarara ndetse n’inzira z’abagenzi bajya cyangwa bava mu mazi n’ahakorerwa n’abakozi b’icyambu.

Ibikorerwa ku cyambu ntibizabangamira ibinyabuzima mu kiyaga cya Kivu

Uretse icyambu kirimo kubakwa mu Karere ka Rubavu hari n’ikindi kirimo kubakwa mu Karere ka Rusizi bikazafasha ubuhahirane bw’uturere dutanu tugize Intara y’Iburengerazuba dukora ku mazi y’ikiyaga cya Kivu.

Kuba nta cyambu cyari ku kiyaga cya Kivu byari imbogamizi ku ngendo zikorerwa mu kiyaga cya Kivu ndetse n’uturere ntitwashoboraga guhahirana dukoresheje amazi kuko nta bikorwa remezo nk’ubwato ndetse n’ibyambu, bikaba byagoraga abatwara ubwato kuko batabonaga aho kurara.

Bamwe mu baturage bagirwaho ingaruka n’ingendo zo mu mazi kubera kutagira icyambu n’inzego zigenzura amato mbere yo guhaguruka ni abatuye Akarere ka Rutsiro bakoresha amazi bajya mu Karere ka Rubavu, bakunze kugira impanuka zo mu mazi bajyanye imyaka ku isoko.

Icyambu kizaba gifite n’inyubako zo gukoreramo

Kutagira icyambu bikaba byari imbogamizi ku bukerarugendo bwo mu mazi kuko hatari uburyo bwo kugenzura amazi mbere yo guhaguruka ndetse n’amato ahari akaba atajyanye n’igihe mu gukora ingendo zo mu mazi zihuza uturere twa Rubavu, Rutsiro, Karongi, Nyamasheke na Rusizi.

Icyambu cya Rubavu giherereye mu Murenge wa Nyamyumba cyatangiye kubakwa tariki 10 Gashyantare 2020 hateganywa ko icyiciro cya mbere kizuzura mu gihe cy’amezi 18 gitwaye Amadolari ya Amerika Miliyoni 6,5.

Uretse icyambu cya Rubavu, harimo kubakwa n’icyambu cya Rusizi.

Abubaka icyambu bagaragaza ko imirimo igana ku musozo

Icyambu kizaba giifte ububiko bwakira metero kibe ibihumbi umunani

Icyambu kizongera ubwiza bw’umujyi wa Gisenyi

Igishushanyo mbonera cy’icyambu ndetse n’ibizajya bihakorerwa

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1631 )