Ibi biciro bishya byasohotse mu itangazo ryashyizwe ahagaragara n’Urwego rw’Igihugu rushinzwe kugenzura imikorere y’inzego zimwe z’imirimo ifitiye Igihugu akamaro (RURA), ku mugoroba wo ku wa Kabiri tariki 5 Ukuboza 2023.

RURA yatangaje ko ibi biciro bizakurikizwa mu mezi abiri ari imbere, guhera kuri uyu wa Gatatu tariki 06 Ukuboza 2023.

RURA yasobanuye ko ihindagurika ry’ibiciro rishingiye ahanini ku ihindagurika ry’ibiciro by’ibikomoka kuri Peteroli rikomeje kugaragara ku isoko mpuzamahanga.”

Minisitiri w’Ubutegetsi bw’Igihugu, Musabyimana Jean Claude, ahereye kuri ibi biciro bishya byashyizwe hanze, yasabye abacuruzi kutongera ibiciro by’umwihariko muri iyi minsi mikuru isoza umwaka.

Yagize ati: “Icyo dusaba cyane cyane abantu bose bafite aho bahuriye no kuboneka kw’ibicuruzwa ku isoko, ni ugukora ibishoboka byose buri wese agakora akazi ke kandi akagakora neza, ku buryo muri iyi minsi mikuru ntabwo twifuza ko ibiciro byazamuka kubera impamvu iyo ari yo yose, kubera ko izo mpamvu zikomeye zatumaga bizamuka ntazihari.”

Minisitiri Musabyimana, yakomeje asaba abacuruzi ko bakwiye kwitegura bakamenya aho ibicuruzwa cyane cyane ibyo kurya biherereye mu gihugu, kugira ngo bashyireho uburyo bwo kubikusanya no kubigeza ku isoko mu buryo bworoshye kugira ngo Abanyarwanda babashe kwishimira iminsi mikuru isoza umwaka.

MENYA UMWANDITSI

Ruzindana Janvier

Umunyamakuru

@RuzindanaJunior

Reba inkuru zose nanditse ( 1228 )