Muri iryo tangazo hari aho agira ati “Mbandikiye mbasangiza isozwa ry’urugendo rwanjye muri filime y’uruhererekane izwi nka City Maid aho mwamenye nka Nadia.”

Yakomeje agira ati: “Guhera kuri season ya 29 Nadia mwakunze ntazongera kuyigaragaramo ku bw’impamvu tutumvikanyeho n’ubuyobozi bwa Zacu Entertainment.”

Sandra yamaze impungenge abamukunze muri iyi filime, abamenyesha ko atavuye muri sinema, ahubwo ko hari byinshi abahishiye, abasaba gukomeza kumushyigikira.

Mu 2022, Ishimwe Sandra yasohoye filime ye bwite yise ‘Umubi’ ahuriyemo n’abavandimwe be, ndetse ikaba irimo n’umubyeyi wabo yakinwe mu bihe bya Guma mu Rugo.

Ubwo yari mu kiganiro n’itangazamakuru ku munsi hamurikwagaho iyi filime ‘Umubi’ uyu mukobwa yavuze ko igitekerezo cyo gukina iyi filime cyaturutse kuri musaza we witwa Kevin Ganza Busigo, akaba imfura mu muryango wabo.

Iyo filime ya Ishimwe, ikaba yarakozwe ishingiye ku nkuru mpimbano y’umuryango ufite umubyeyi w’umugabo wayobotse inzira ya sekibi, agatanga n’umukobwa we waje kwitaba Imana mu buryo butunguranye.

Ishimwe Sandra ni umwe mu bakobwa bamaze igihe kinini muri sinema nyarwanda ndetse wagiye yiyongerera igikundiro bitewe n’ubuhanga yagiye agaragaza cyane ubwo yakinaga muri City Maid, yamaze gusezeramo.