Aya makipe yombi ari mu gihugu cya Misiri kuva tariki ya 12 Mata 2024, aho kuri uyu wa gatandatu aribwo hamenyekanye amatsinda aya makipe yombi aherereyemo, ndetse akaba yamaze no kumye amakipe bagomba gutangira bahura.

Ikipe ya Gisagara volleyball ibitse igikombe cya shampiyona cya 2023, yisanze mu itsinda rya 3 aho iri kumwe n’amakipe nka Port Autonome De Douala (Cameroon), Rukinzo Volleyball Club (Burundi), Asw Blida Sport Ville de Blida (Algeria), Prisons Volleyball Club (Kenya) ndetse na Volleyball Club Espoir yo muri Congo (DRC).

Ikipe ya Police VC yabaye iya 3 umwaka ushize, ndetse akaba ari n’inshuro yayo ya mbere yitabiriye iyi mikino, yisanze mu itsinda rya kane aho iri kumwe n’amakipe nka Kenya Ports Authority (Kenya), Green Buffaloes Volleyball Club (Zambia), University of Zimbabwe Wolves Club (Zimbabwe) ndetse na Volleyball Club Garde yo muri Congo (DRC).

Ikipe ya Gisagara yahagurukanye abakinnyi 11, mu gihe ikipe ya Police yo yahagurukanye abakinnyi 13.

Nyuma ya tombola, amakipe yombi akaba yahise amenya uko atangira akina n’abo bagomba guhura na bo. Ikipe ya Gisagara Volleyball Club yagombaga gucakirana na Sports Ville de Blida yo muri Algeria, na ho Police VC igacakirana na KPA yo muri Kenya.

Iyi mikino yatangiye uyu munsi tariki ya 14 Mata, biteganyijwe ko izarangira tariki ya 24 Mata 2024.

Amakipe ahagarariye u Rwanda i Cairo yatsinzwe imikino ya mbere

Mu irushanwa nyafurika riri guhuza amakipe yabaye aya mbere iwayo muri Volleyball mu bagabo, amakipe ahagarariye u Rwanda ari yo Police VC na Gisagara yatsinzwe imikino yayo ya mbere.

Ikipe ya Police VC ni yo yakinnye umukino wa mbere iza gutsindwa na KPA yo muri Kenya, amaseti 3-1 (25-17, 23-25, 25-21, 25 - 20).

Hakurikiyeho ikipe ya Gisagara VC na yo iza gutsindwa amaseti 3-1 na ASVB (18-25, 25-16, 26-24, 25-15)