Ni umukino utagoye ikipe y’u Rwanda, dore ko iseti ya mbere aba Banyarwandakazi bayitsinze ku manota 25 kuri 12 ya Kenya, iya kabiri bayitsinze ku manota 25-14 mu gihe iya nyuma ariyo ya gatatu bayitwaye ku manota 25 kuri 21 ya Kenya.

Uretse kwegukana igikombe, ikipe y’u Rwanda yanabonye itike y’imikino Paralempike izabera i Paris muri Kanama uyu mwaka.

Ikipe y’Igihugu y’abagore ni ku nshuro ya gatatu yikurikiranya igiye kwitabira imikino Paralempike. Ku nshuro ya mbere u Rwanda rwitabiriye mu 2016 ubwo iyi mikino yaberaga muri Brazil, ku nshuro ya kabiri hari 2021 ubwo imikino yaberaga Tokyo mu Buyapani, icyo gihe ho u Rwanda rwakoze amateka rutsinda ikipe y’Igihugu y’u Buyapani amaseti 3-0, rukaba Igihugu cya mbere cyo munsi y’ubutayu bwa Sahara cyatsinze umukino mu mikino Pararempike.

Mu bagabo u Rwanda ntabwo rwahiriwe n’iyi shampiyona Nyafurika, kuko rutashoboye kugera ku mukino wa nyuma dore ko rwasezerewe muri 1/2 na Maroc rutsinzwe amaseti 3-2. Ibi byatumye rwegukana umwanya wa gatatu nyuma yo gutsinda Algeria amaseti 3-0.