Rayon Sports ngo izungukira byinshi muri Rayon Sports Day yo mu Bubiligi

Biteganyijwe ko uyu muhango uzabera i Bruxelles, mu murwa mukuru w’Ububiligi, tariki ya 12 ugushyingo 2016.

Iyi “Rayon Sports Day” ni iya kabiri kuko iya mbere yabaye mu mwaka wa 2013.

Ubuyobozi bwa Rayon Sports butangaza ko kuri iyi nshuro hazaba ibiganiro hagati y’abafana ba Rayon Sports baba mu Bubiligi.

Bazanungurana ibitekerezo ku buryo ikipe yabo yatera imbere; nkuko Rutagambwa Martin, umuyobozi wungirije w’umuryango wa Rayon Sports yabitangarije ikiganiro KT Sports tariki ya 19 Ukwakira 2016.

Agira ati “Rayon Sports Day’ twarayinogeje cyane kandi n’imyiteguro nk’abayobozi twarayirangije.

Twateguye iki gikorwa mu rwego rwo gusabana n’abafana tunabakangurira ko bagomba kugira uruhare rukomeye mu iterambere ry’ikipe yabo bayitera inkunga.”

Ikindi ngo ni uko bazanamurika igikombe cy’amahoro Rayon Sports yatwaye uyu mwaka wa 2016, ubwo yatsindaga APR ku mukino wanyuma igitego 1-0.

Rutagambwa avuga ko hazanaba umukino w’ubusabane. Abahoze bakinira Rayon Sports mu myaka yo hambere bazakina n’abakiniye Kiyovu Sports.

Agira ati “Tuzamurika igikombe cy’amahoro twatwaye tukimurikire abakunzi bacu, nyuma kandi twanateguye umukino w’ubusabane hagati y’abahoze badukinira n’abahoze bakinira Kiyovu.”

“Rayon Sports day” izanagaragaramo abahanzi bazasusurutsa abayitabiriye barimo Samputu, Kitoko Bibarwa n’abandi bataremezwa.

Rutagambwa avuga ko mu minsi iri imbere bateganya kwagura iki gikorwa kuburyo “Rayon Sports Day” izajya ibera mu bindi bihugu.