Nyuma y’aho ikipe ya Rayon Sports iviriye muri Nigeria, yahise itangira imyitozo kuri Stade Amahoro kuri uyu wa Kabiri, gusa si ko abakinnyi bose b’iyi kipe babashije gukora imyitozo.

Mugheni Fabrica wamaze guhagarikwa icyumweru adakorana n’abandi imyitozo

Bagisoza imyitozo, twegereye umutoza Masudi Juma tumubaza impamvu bamwe mu bakinnyi batari kugaragara mu myitozo barimo Munezero Fiston, Moussa Camara, ndetse na Mugheni Fabrice, aza kugutangariza ko Camara na Fiston bafite utubazo tw’imvube ariko tworoheje, gusa adutangariza ko Mugheni Fabrice we bamuhaye igihano cyo kumara icyumweru Atari kumwe na bagenzi, azira kuba yaragaragaje imyitwarire mibi mu ikipe.

“Mugheni twamuhannye icyumweru kimwe, azongera gutangirana imyitozo n’abandi ku wa Gatatu, tukazanamukata amafaranga, ntabwo twakwemera indiscipline muri Rayon Sports, umuntu akoze ikosa nk’iryo ukamureka n’undi ejo yazabikora, niba adafite ikinyabupfura nk’icy’abandi ntabwo twabireka gutyo” Masudi, umutoza wa Rayon Sports

Mugheni Fabrice azanakatwa umushahara mu gihe cy’icyumweru cyose

N’ubwo umutoza Masudi Juma atigeze atangaza imyitwarire mibi uyu mukinnyi yagaragaje iyo ariyo, amakuru agera kuri Kigali Today aravuga ko Mugheni Fabrice yaba yaratutse umutoza Lomami Marcel.

Biteganyijwe ko uyu mukinnyi ataza kugaragara mu mukino uza guhuza Rayon Sports na Rugende Fc mu gikombe cy’Amahoro kuri uyu wa gatatu, ndetse ntazanagaragara mu mukino iyi kipe izakina na Rivers United yo muri Nigeria n’ubwo ubusanzwe yari afite amakarita y’umuhondo

MENYA UMWANDITSI

Sammy Imanishimwe

Umunyamakuru

@ Samishimwe

Reba inkuru zose nanditse ( 2585 )