Perezida Denis Sassou Nguesso wa Congo Brazzaville ni muntu ki?

Yanditswe na

Gasana Marcellin

24-07-2023 - 18:13' | Ibitekerezo ( )

Perezida wa Repubulika ya Congo, imenyerewe nka Congo Brazzaville Denis Sassou Nguesso, yayoboye igihugu mu bihe bibiri bitandukanye uhereye mu 1979 kugeza mu 1992 ubwo yatsindwaga amatora, akongera gufata ubutegetsi ku ngufu za gisirikare mu 1997.

Uyu mugabo ukomoka mu bwoko bw’aba Mbochi, yavukiye mu gace ka Edou mu karere ka Oyo mu majyaruguru ya Congo Brazzaville mu 1943.

Yatangiye urugamba rw’impinduramatwara kuva mu 1969 kugeza mu 1977 ari mu mutwe w’abasirikare bamanukira mu mutaka. Ni urugamba yafatanyije na Capitaine Marien Nguabi wari ku ruhembe, ari nabwo bashyizeho Ishaka ry’Abanyekongo ry’Umurimo (Parti Congolais du Travail).

Denis Sassou Nguesso wakoraga mu rwego rw’ubutasi bwa gisirikare akanaba minisitiri ku butegetsi bwa Nguabi, yagize uruhare mu guhirika ubutegetsi bw’abakuru b’ibihugu batandukanye barimo Alphonse Massamba Debat wayoboye Congo bwa mbere kuva mu 1963 kugeza mu 1968.

Minister w'ubucuruzi Jean Chrysostome Ngabitsinze (iburyo) na Minisitiri w'Ubutwererane Mpuzamahanga wa Congo-Brazzaville, Denis Christel Sassou Nguesso basinya amasezerano mu 2022

Nyuma y’iyicwa rya mugenzi we Capitaine Nguabi, Sassou Nguesso yagiye ku butegetsi mu 1979, mu 1990 ashyiraho politike y’amashyaka menshi, ariko mu 1991 yambuwe ububasha bwo gufata ibyemezo agumana izina ry’icyubahiro gusa, hanyuma mu 1992 Pascal Lissouba amusimbura binyuze mu matora yakurikiwe n’ubushyamirane Sassou Nguesso ahungira mu Bufaransa.

Amaze imyaka itanu mu buhungiro, yiyemeje kugaruka mu gihugu afite intego yo gusubirana ubutegetsi, hanyuma mu 1997 abifashijwemo n’ingabo z’igihugu, ahirika ubutegetsi bwa Pascal Lissouba nyuma y’intambara n’ubushyamirane byamaze amezi atanu.

Mu 2002 hashize imyaka itanu agarutse ku butegetsi, habaye amatora y’umukuru w’igihugu arongera aratorwa, 2009 na 2016 biba uko nyuma y’uko muri Congo bari bamaze guhindura itegeko nshinga binyuze mu matora ya kamarampaka yamaganywe n’abatavuga rumwe nawe. Gusa ibyo ntibyamubujije kongera gutorerwa manda ya kane muri 2021, akaba ateganya kongera kwiyamamariza manda ya gatanu mu matora ya 2026.

Denis Sassous Nguesso, nyuma y’imyaka fafi 40 ayoboye Congo Brazzaville guhera mu 1979, nubwo habayemo icyuho cy’imyaka itanu (1992-1997), abandi bakuru b’ibihugu bamuhimbye izina rya Empereur cyangwa se umwami w’abami.

Lucie Bongo na Omar Bongo ahagana mu 2000

Yasezeye mu gisirikare mu 1989 afite ipeti rya jenerali. Yashakanye na Antoinette Sassou Nguesso babyarana abana babiri ari bo Denis Christel Sassou Nguesso, uyu akaba ari Minisitiri w’ubutwererane mpuzamahanga wa Congo na nyakwigendera Edith Lucie Bongo Ondimba wari umugore wa nyakwigendera Omar Bongo wari Perezida wa Gabon. Bombi bitabye Imana muri 2009 ariko mu mezi atandukanye bazize uburwayi.

Hagati aho ariko amakuru ari ku rubuga rwa Wikipedia agaragaza ko Denis Sassou Nguesso afite abandi bana barenga 20 yabyaye hanze kandi hafi ya bose ku mazina yabo hiyongeraho izina Sassou Nguesso.

Ni ubwa gatatu asura u Rwanda uhereye ku ngoma ya Habyarimana mbere ya 90. Yagarutse nyuma ya 2010 nyuma y’uko mugenzi we w’u Rwanda Kagame Paul yarasuye bwa mbere Congo Brazzaville, agasubirayo mu 2022, Sassou Nguesso nawe akagaruka kuri iyi nshuro (2023) mu rwego rwo gukomeza gushimangira umubano ushingiye ku bufatanye mu bikorwa by’iterambere.