Ubu buhinzi hari abavuga ko bubinjiriza agatubutse, barimo Nyirahakiziyaremye Frida w’imyaka 46 y’amavuko, akaba atuye mu Karere ka Gasabo, Umurenge wa Kimironko, Akagari ka Nyagatovu, Umudugudu wa Bukinanyana (iruhande rwa Controle Technique).

Nyirahakiziyaremye uhinga imboga mu mabase n’indobo zishaje cyangwa mu mapine yakoreshejwe, yaganiriye na Kigali Today agira ati "Hari igihe tugira dutya umuntu akaza akagura uriya murima ngendanwa ku mafaranga bihumbi 100Frw."

Nyirahakiziyaremye avuga ko ibase yuzuye seleri cyangwa izindi mboga, igurwa hagati y’ibihumbi 10Frw na 20Frw, ku buryo ku kwezi ngo ashobora gusarura amafaranga arenga ibihumbi 400Frw.

Imurikabikorwa ry’Abafanyabikorwa mu iterambere ry’Akarere ka Gasabo (JADF), ryitabiriwe n’abakora ubuhinzi bwo mu mavaze, abakora ibintu bitandukanye birimo amavuta, amasabune, abadozi b’imyenda, abakora ibicanwa n’imbabura zibirondereza, abanyabukorikori b’ibintu bitandukanye n’abandi.

Umuyobozi Nshingwabikorwa w’Akarere ka Gasabo, Pauline Umwali, agira ati "Hari umuntu utazi ko yakwikorera isabune, ariko niyigerera hano azabona ko ibyo bishoboka. Hari utazi ko ashobora guhinga mu ivaze mu rugo cyangwa agafatanya imbaho agashyiramo itaka, agakora akarima k’igikoni."

Umuyobozi wa JADF mu Karere ka Gasabo, Enjeniyeri André Mutsindashyaka, avuga ko iyo mirimo y’ubuhinzi, ubudozi, ubugeni, ubukorikori n’indi, yigishijwe urubyiruko n’abagore bakennye, mu rwego rwo kurwanya ubushomeri, ku buryo uzahagera wese azahavana ibitekerezo n’ubumenyi byamufasha gutera imbere.

Enj Mutsindashyaka avuga ko amadini n’amatorero hamwe n’abikorera bafite ibyo bagezeho bahereye kuri duke, ari bo bazafasha ababagana kumenya uburyo bakwiteza imbere.

Akarere ka Gasabo na ko kavuga ko iri murikabikorwa, rizaba umwanya wo gutanga serivisi zikunze gusabwa n’abaturage cyangwa kubarangira aho bazisabira.