Ni umuyoboro wubatswe na Leta y’u Rwanda, ku bufatanye n’Umushinga ‘Water Aid Rwanda’, ukaba uha amazi abaturage 46,500.

Bamwe mu batuye muri iyo mirenge, bavuga ko kuva babaho batigeze bagira amazi yo meza, ko ahubwo bavomaga ay’ibiziba mu migezi.

Ibi ngo byabateraga indwara ahanini ziterwa no kunywa amazi mabi, ndetse n’iziterwa n’umwanda.

Uwitwa Mukashyaka Consolée, yabwiye itangazamakuru ati “Twavomaga amazi mabi cyane, ku buryo no kuyanywa byabaga bigoye cyane! Ubwo abana bakarwara inzoka n’izindi ndwara, ariko ubu ibyo byose byarakemutse”.

Uyu muturage akomeza avuga ko uretse no gukira indwara zaterwaga no kunywa amazi mabi, ubu ngo banaruhutse imvune zo kujya kuvoma amazi ahantu kure.

Ati “Nk’abanyeshuri bo rwose hari ubwo banasibaga amashuri, bitewe no kuba bagiye kuvoma ahantu kure, ugasanga bavuye yo amasaha yo kujya kwiga yarenze bakarisiba.

Umuyobozi wa Water Aid Rwanda, Vestine Mukeshimana, agaragaza ko banejejwe no kuba hari abaturage batagiraga amazi meza na makeya, none bakaba barayabonye.

Uyu muyobozi ariko agaragaza ko n’ubwo aba baturage bamaze kubona amazi, hari n’abandi batuye muri aka Karere ka Bugesera abataragerwaho n’amazi meza, akabizeza ko intego ya Water Aid ari uko buri Muturarwanda agerwaho n’amazi meza.

Agira ati “Turahangayitse kubera ko hari abatarayabona. Turabizeza igenamigambi rikomeza, kugeza buri muturage wa Bugesera abonye amazi meza, ndetse birenge na Bugesera buri Munyarwanda abone amazi meza”.

Minisitiri w’Ibikorwa Remezo, Dr. Jimmy Gasore, avuga ko kimwe mu bintu bishimishije, ari uko uyu muyoboro wahaye amazi abaturage b’utugari tune two mu Mirenge ya Juru na Mwogo, twari tubayeho nta mazi meza tugira.

Minisitiri Dr. Gasore yagaraje ko ubu Leta yafashe ingamba zo gucunga imiyoboro y’amazi yegerezwa abaturage, zituma amazi abaturage bahabwa bazajya bayahorana.

Agira ati “Leta yafashe ingamba zikomeye kuri iki kibazo. Ubundi wasangaga ucunga imiyoboro ari umucuruzi ugomba gukora yunguka, rimwe na rimwe inyungu ze zikaba ari zo ziza imbere”.

Akomeza agira ati “Ubu rero Leta yafashe ingamba ko imiyoboro yose by’umwihariko iyo mu cyaro yegurirwa WASAC, ku buryo aho dutanze amazi ihaguma, igakomeza ikita ku bikorwa remezo, ndetse n’ibyangiritse bigasanwa”.

Minisitiri Dr. Gasore ariko anaboneraho kwibutsa abaturage ubwabo kugira uruhare mu gucunga no gufata neza ibikorwa remezo by’amazi begerezwa, bakajya batanga amakuru ku bashaka kubyangiza.

Uyu muyoboro watashywe ufite uburebure bw’ibilometero 45, ukaba uha amazi abaturage 46,500 bo mu Mirenge ya Mwogo na Juru yo muri Bugesera.

Kuri uyu muyoboro, hubatswe amavomo 25 mu Murenge wa Mwogo, ndetse n’andi 12 mu Murenge wa Juru.