Ni ibyuma bigenda bishyirwa ku migezi ahantu hatandukanye (Hydrological stations), buri cyuma kiba gifite kamera ireba mu mazi, ifite urusinga rujyana amakuru ku gice cyacyo cyabugenewe gihita kiyohereza ku babishinzwe, haba hari icyemezo kigomba gufatwa bigakorwa ku gihe, ayo makuru ngo akaba anifashishwa mu igenamigambi ry’Igihugu.

Nsanzabera Alphonse, umuturage wo mu Murenge wa Nyarugenge mu Karere ka Bugesera, umwe mu bahinga mu gishanga kinyurwamo n’umugezi w’Akanyaru, ahagabanira Intara y’Iburasirazuba n’iy’Amajyepfo, avuga ko icyuma cyahashyizwe kibafitiye akamaro.

Agira ati “Baradusobanuriye, kuko iyo baje gusura iki cyuma batubwira uko bihagaze, ubu natwe twamenye akamaro kacyo. Nk’ubu umwaka ushize baraje batubwira ko amazi y’uyu mugezi arimo kwiyongera cyane, imyaka yaburaga iminsi mike ngo tuyisarure twahise tuyikuramo, nyuma yaho gato umugezi wahise wuzura cyane, amazi asandara mu mirima hose hararengerwa”.

Ati “Urumva rero ko ari igikorwa kidufitiye akamaro kanini, kuko iyo tutabona ayo makuru mbere imyaka yacu yari kurengerwa tugahomba. Turashimira ubuyobozi bw’Igihugu budahwema kutureberera”.

Ibyo bikorwa remezo bifite ikoranabuhanga rigezweho, u Rwanda rwabibonye ku bufatanye n’Umuryango ushinzwe kurengera amazi y’ikibaya cya Nili (Nile Basin Initiative/NBI), hakaba hamaze gushyirwaho stations esheshatu (6) muri ubwo bufatanye, ari zo iya Kanzenze, Kanyaru, Muvumba, Akagera, iyiri ku kiyaga cya Cyohoha n’iri kuri Rweru.

Umuyobozi Mukuru wa NBI, Florence Grace Adongo, wahagarariye umuhango wo gushyikiriza Leta y’u Rwanda ibyo bikorwa remezo ku wa 16 Ugushyingo 2023, avuga ko ari ibyo kwishimira kuba byaratangiye gukora.

Ati “Twishimira ko izi stations zatangiye gukora mu Rwanda, ari na cyo gihugu cya mbere cyarangije kuzubaka mu karere NBI ikoreramo. Ibi ni ibikorwa byifashishwa mu igenamigambi ry’ibihugu birimo, ndetse no gucunga neza umutungo kamere w’amazi. Twabishyikirije u Rwanda, tukaba twumva bizarugirira akamaro ndetse n’akarere muri rusange”.

Uyu muyobozi wari mu itsinda ryasuye zimwe muri izo stations, harimo iya Kanzenze na Kanyaru, avuga ko kuri ibyo byuma hazongerwamo ikoranabuhanga ryo gupima ubwiza bw’amazi, hakaba hagishakishwa ubushobozi.

Ibipimo bitangwa n’ibyo byuma ngo hari byinshi bifasha u Rwanda, nk’uko bisobanurwa na Remy Duhuze, ukuriye ishami rikurikirana ubwiza n’ingano y’amazi muri RWB abisobanura.

Ati “Nkatwe dufite mu nshinga gutanga impushya zo gukoresha amazi, biradufasha cyane kuko tuba tuzi ayo dufite bityo tukamenya ayo dutanga. Hari kandi nk’abubaka ingomero z’amashanyarazi, ibi bipimo biba bikenewe kuko tubabwira aho mu gihe cy’imvura amazi agera ndetse no mu gihe cy’izuba aho amanuka akagera, bakamenya uko bubaka. Hari ndetse n’abafite imishinga yo kuhira imyaka, kugeza amazi ku baturage, tutibagiwe kuba twatanga amakuru ku mugezi runaka amazi yaho arimo azamuka bidasanzwe, hakaba hafatwa ingamba ntihagire abantu bigiraho ingaruka”.

Umuyobozi Mukuru wa RWB, Dr Rukundo Emmanuel, yashimiye NBI kuri ibyo bikorwa yagejeje ku Rwanda, avuga ko bizarugirira akamaro ndetse n’akarere muri rusange, anizeza ko bizakoreshwa uko bikwiye bigatanga umusaruro.

Umuryango wa NBI washinzwe muu 1999, ukaba ugizwe n’ibihugu 10, ari byo u Rwanda, u Burundi, Kenya, Sudani y’Epfo, Sudani, Tanzania, Uganda, Ethiopia, Misiri na Repubulika Iharanira Demokarasi ya Congo, naho Eritrea ikaba muri uyu muryango nk’indorerezi.