Uru ruzinduko ruje gushimangira umubano mwiza usanzwe hagati ya Kenya n’u Rwanda muri rusange n’uw’igisirikare cy’impande zombi by’umwihariko.

U Rwanda ngo rwateye intambwe igaragara ari yo mpamvu Abanyakenya hari byinshi baza kurwigiraho.

Byavugiwe mu kiganiro aba banyeshuri bagiranye na bamwe mu bayobozi bakuru b’ingabo z’u Rwanda, cyabereye ku cyicaro cya Minisiteri y’Ingabo, kuri uwu wa mbere tariki 7 Ukuboza 2015.

Umuvugizi w’ingabo z’u Rwanda, B.G Nzabamwita Joseph yavuze ko uretse ibijyanye n’umutekano, aba banyeshuri hari n’ibindi bikorwa by’iterambere bazasura.

Yagize ati “Badusuye ngo barebe ibyo igisirikare cy’u Rwanda kimaze kugeraho ndetse n’aho iterambere ry’igihugu muri rusange rigeze nyuma ya Jenoside yakorewe Abatutsi mu 1994.”

Igisirikare cya Kenya ngo kirigira ku bunararibonye bw’icy’u Rwanda.

yakomeje avuga ko aba banyeshuri bakaba n’abasirikare bakuru mu gihugu cyabo, bakura amasomo ku Rwanda azabafasha mu myigire yabo no mu nzego zitandukanye z’umutekano bazaba bashinzwe kuyobora.

B. G Nzabamwita yagarutse kandi ku bindi bikorwa bazasura muri uru rusinduko rwatangiye ku italiki 5 Ukuboza 2015, rukazamara iminsi umunani.

Ati “Bazasura izindi nzego n’amashuri bya girikare, basure za Minisiteri zitandukanye ndetse n’ibindi bikorwa by’amajyambere birimo cyane cyane ibyo kongera ingufu z’amashanyarazi.”

Umuyobozi w’iri shuri na we uri muri uru ruzinduko, Lieutenant Général J N Waweru, avuga ko bazareba n’imiterere y’amategeko igihugu kigenderaho cyane cyane ayerekeye uburezi.

Ati “Turashaka kwigira no ku mategeko u Rwanda rugenderaho, yarufashije kwiteza imbere nyuma ya Jenoside kuko bigaragarira buri wese ko rwateye intambwe ndende kandi vuba.”

Iri shuri rya girikare ryo muri Kenya ryigirwamo n’abandi banyeshuri bo mu bihugu bitandukanye bya Afurika, harimo n’Abanyarwanda.

MENYA UMWANDITSI

Jean Claude Munyantore

Umunyamakuru

@ MunyantoreC

Reba inkuru zose nanditse ( 2072 )