Mu mugoroba w’ejo ku itariki ya 07/03/2013 hagaragaye umukozi w’imodoka zitwara abagenzi Volcano Express witwa Murwanashyaka Warless waciriwe imyenda ndetse banamukomeretsa ku munwa kubera ingumi yakubishwe n’umukeba we witwa Bizimana Michel ukorera Horizon Express.

Murwanashyaka wakubishwe agaciribwaho n’imyenda, avuga ko atazi icyo mugenzi we yamuhoye ngo kuko nta kintu nta kimwe bari bapfuye. Yagize ati: “Uretse wenda ibibazo dusanganywe byo gutanguranwa abagenzi, naho ubundi ntacyo mpfa n’uyu musore kuko nanjye yankubise bintunguye.”

Kigali Today yagerageje kuvugana na Bizimana Michel uvugwaho gukubita mugenzi we ntibyadukundira, kuko ibi bikimara kuba yahise aburirwa irengero.
Abo twasanze imbere y’aho izi modoka zikorera biboneye ibyahabereye bavuze ko nabo batigeza bamenya icyo aba basore bapfuye kuko ngo bagiye kubona bakabona umwe afashe undi amuhata ibipfunsi anamuciraho imyenda.

Icyakora bamwe mu bagenzi bari aho bagiraga bati: “Erega n’aho baratinze… Uzi iyo urimo kuza ugana muri gare wenda utanafite gahunda yo kugenda bagatangira kukubyiganiriho buri umwe akubwira ngo urajyana n’iyacu dore irahageze bakakurwanira? Rimwe na rimwe abagenzi nibo bahutazwa ahubwo, ubundi bakabanduza kuko buri wese aba akurubana ashaka kujyana iwabo.”

Ni kenshi abagenzi bagiye binubira abakozi b’izi modoka za Express, ngo kuko babatesha umutwe igihe baje gutega imodoka, bakavuga ko nta mpamvu abantu bakwiye kuza baguhuriraho bakubaza aho ugiye kandi wavuye imuhira uzi iyo ugiye ndetse n’imodoka uribugendemo.

Eric Muvara