Umuvugizi wa Polisi, ACP Damas Gatare, yatangaje ko ibyabaye muri Kenya ari igikorwa kigayitse, bitewe n’uko ababikoze bangiza ubuzima bw’abaturage basanzwe b’inzirakarengane. Polisi y’u Rwanda irazirikana ko ibi bishobora no kuba mu bindi bice by’isi cyanwa iyindi mijyi, bityo gufata ingamba hakiri kare bikwiye.

ACP Damas Gatare atangaza ko iki kibazo kiri ku rwego mpuzamahanga, bityo Polisi y’u Rwanda ikorana n’izindi nzego zishinzwe umutekano.

Yagize ati: “kubera ko iki kibazo kiri ku rwego mpuzamahanga, ni yo mpamvu dukorana n’izindi nzego zishinzwe umutekano, zaba iz’imbere mu gihugu, zaba izo ku rwego mpuzamahanga nka Interpol cyangwa se EAPCO”.

Umuvugizi wa Polisi, ACP Damas Gatare.

Umuvugizi wa Polisi avuga ko bimwe mu byo bibandaho muri iki gihe ari uguhanahana amakuru ku birebana n’umutekano, ndetse no gukurikirana ibyaha bikorerwa mu miyoboro y’ikoranabuhanga bita mu cyongereza “cyber-crimes”. Aha ngo bahibanda kuko hakoreshwa cyane n’abafite imigambi yo kugaba ibitero nk’iki cyabereye muri Kenya.

ACP Damas Gatare yemeza ko hari abapolisi b’u Rwanda bahugurwa umunsi ku wundi, bategurwa guhangana n’ibikorwa by’iterabwoba.

Al Shabab itangaza ko yagabye igitero kuri Kenya tariki 22/09/2013 kubera ingabo z’icyo gihugu zajyanywe muri Somalia guhangana n’abarwanyi b’uyu mutwe. Nta ngabo u Rwanda rwohereje muri Somalia, ariko Polisi y’u Rwanda ivuga ko ibyo itabigenderaho bityo igomba guhora yiteguye.

Christian Mugunga