Urwo ruhinja rwitabye Imana ubwo nyina yari yinjiye mu nzu maze rwegera indobo y’amazi yari hafi yarwo maze ruba ruyituyemo rubanjemo umutwe; nk’uko abaturanyi b’uyu muryango ndetse na nyina ubwe babitangaje tariki 03/12/2012.

Urwo ruhinja nibwo rwari rutangiye kwiga guhaguruka rwifashishije ibintu birwegereye nk’uko Nyirabagwiza Calorina ubana n’ababyeyi barwo mu gipangu kimwe abitangaza.

Agira ati: “ urupfu rw’uriya mwana rwabaye mu kanya gato cyane kuko nyina nibwo yari agiye mu nzu agarutse asanga ruguye mu ndobo y’amazi”.

Indobo y’amazi yabaye ingusho ku mwana w’uruhinja ahita apfa ( Photo: Jean Pierre T.)

Uruhinja rukimara kuvanwa muri iyo ndobo nta bundi butabazi bw’ibanze rwakorewe kuko rwari rwamaze gushiramo umwuka.

Gupfa ku muntu ni nko guhumbya no guhumbura kuko umunsi we iyo wageze ntaho yahungira urupfu. Aya ni amwe mu magambo abaturanyi babwiraga nyina w’umwana witabye Imana bamuhumuriza.

Uru ruhinja rwitabye Imana ruguye mu ndobo y’amazi rwari imfura iwabo nk’uko Muhimpundu Marie Chantal na Kalisa Bosco bari ababyeyi barwo babitangaza.

Jean Pierre Twizeyeyezu