Uyu munyegare yagonzwe n’imodoka yo mu bwoko bwa Land Cruser yambaye purake RAB 392 E imwinjiza mu mapine yayo ubwo yagonganaga n’ indi modoka yari imbere yo mu bwoko bwa Fuso ifite purake RAB 674 W yari iparitse iruhande rw’umuhanda umushoferi wayo arimo ayihindurira ipine.

Impanuka ikimara kuba polisi y’igihugu ishinzwe umutekano wo mu muhanda mu karere ka Nyanza yahise ihagera ifasha uwo munyegare kumugeza mu bitaro bya Nyanza ari naho arwariye.

Cruser yinjiriye Fuso iyihereye inyuma.

Ngabonziza Wellars w’imyaka 32 wari utwaye Fuso na Habiyaremye Kalinda Heritier wari utwaye imodoka ya Land Cruiser bose ntacyo babaye uretse ko imodoka zabo zangiritse ku buryo butandukanye.

Mu byateye iyi mpanuka ni umuvuduko imodoka ya Land Cruser yari ifite n’uko indi modoka iyituritse imbere umushoferi wayo abura uko abigenza ahitana Fuso yari iparitse iruhande rw’umuhanda umushoferi wayo arimo ayihindurira ipine; nk’uko bamwe mu baturage bari hafi aho babivuga.

Imodoka ya Land Cruser niyo yangiritse cyane kuko yagonze Fuso iyinjiyemo mu gihe umunyagare we yari mu mapine yayo n’igare rye bigaragara ko ryangiritse.

Mu mujyi wa Nyanza impanuka zihitana abanyegare cyangwa se bakazikomerekeramo ku buryo bukabije ntizari zihaherutse kuko polisi y’igihugu ikorera muri ako karere n’ubuyobozi bw’ako bari bafashe icyemezo cyo guca amagare muri kaburimbo bitewe n’impanuka yatezaga.

Umunyegare ngo yavanwe mu mapine y’iyo modoka yakomeretse cyane.

Imbogamizi yabonetse muri iki cyemezo n’uko inama njyanama y’akarere ka Nyanza yagaragaje ko itabyishimiye guca amagare muri kaburimbo bityo bituma uyu umwanzuro udashyirwa mu bikorwa nk’uko umwe mu bakozi b’akarere ka Nyanza utifuje ko amazina ye agaragazwa mu itangazamakuru yabitangaje.

Nyuma y’iyi mpanuka izi nzego zombi z’ubuyobozi zatangaje ko zigiye kongera guhagurukira iki kibazo cy’abanyegare bakigendagenda mu muhanda wo mu mujyi wa Nyanza kandi mu by’ukuri bigaragara ko bawugiriramo impanuka zikomeye ndetse bamwe bakanahatakariza ubuzima.

Jean Pierre Twizeyeyezu