Aba bagabo batawe muri yombi ni uwitwa Niyonsenga Vincent w’imyaka 22, Tuyishime Maurice w’imyaka 22, Ngabo Emmanuel w’imyaka 16, Uwimana Jean Marie Vianney w’imyaka 26 na Muneza Laurent ufite imyaka 38 y’amavuko.

Aba bagabo uko ari 5 bazira ko ku itariki 01/07/2013 bakubise abayobozi b’umudugudu wa Bizenga mu kagari ka Kibogora mu murenge wa Kanjongo barabakomeretsa bikomeye ku buryo bamaze hafi iminsi itatu mu bitaro bari muri koma.

Abayobozi b’umudugudu wa Bizenga bakubiswe icyo gihe ni Bisengimana Daniel na Habimana Sarathiel, ubwo icyo gihe bari bagiye gukemura ikibazo cy’umuryango.

Nyuma y’umukwabo watumye batabwa muri yombi, aba bagabo bakoze urugomo bahise bajyanwa gufungirwa kuri Station ya Polisi ya Kanjongo mu karere ka Nyamasheke.

Amakuru twabashije kumenya ni uko abakekwaga ku bijyanye n’icyo cyaha cy’urugomo rwibasiye abayobozi b’umudugudu batawe muri yombi bose.

Amakuru dufite avuga ko izi nsoresore zari zarigize intakoreka mu gace ka Kibogora ku buryo aho babaga bari nta muntu wapfaga kuvuga irinyuranyije na bo kuko ngo bahitaga bamukubita bakamugira intere.

Emmanuel Ntivuguruzwa