Mukamasabo w’imyaka 42, utuye mu kagari ka Gitwa ko mu murenge wa Mugano mu karere ka Nyamagabe, yashinjaga uwo mukobwa we witwaga Nyirahabimana Marthe ko yataye iwabo akajya kuba mu mihana k’uwitwa Joel,

Amakuru aturuka mu baturanyi avuga ko uyu mukobwa wari warahunze kuko iwabo bamufataga nabi, akimara kubona nyina aje kumutwara yahise yiruka ataka avuga ko nyina ari bumwice agira ati: “Ubwo aje kuntwara baranyica”.

Abaturanyi baramufashe bamusubiza nyina amutahana amukubita bikabije, ku buryo yageze aho akanamusiga isusa. Nyuma yo gukubitwa nyakwigendera yagiye mu buriri aho abavandimwe be baje kumusanga yashizemo umwuka.

Uyu mugore nawe ubwe, wiyemerera ko yihekuye umugabo we adahari, avuga ko yakubise uyu mukobwa we gusa ngo yamukubitaga atazi ko ari bupfe.

Amakuru aturuka mu buyobozi bw’umurenge wa Mugano avuga ko ababyeyi be bamaze kumenya ko umukobwa wabo yapfuye, bazindutse bamuhamba ariko ubuyobozi bw’umurenge na Polisi bibimenye bitegeka ko bamutaburura kugira ngo umurambo we ukorerwe isuzuma.

Francois Xavier Utazirubanda, Umunyamabanga nshingwabikorwa w’umurenge wa Mugano avuga ko kugeza ubu icyamwishe kitari cyamentekana.

Utazirubanda ati: “ Ntawamenya neza icyo yazize ariko nyina yemera ko ariwe wamwishe ariko akavuga ko yamukubise atazi ko apfa.”

Mu gihe hasigaye kumenya ibyavuye mu isuzuma, uyu mugore aracyari mu maboko ya Polisi kuri sitasiyo ya Kaduha.

Kubabaza umwana bikabije, cyangwa kumuha ibihano biremereye, bikamuviramo urupfu ni kimwe mu byaha bihanwa n’amategeko y’u Rwanda.

Jacques Furaha