Abakomerekejwe n’izi mbogo ni Niyigena Merveille ufite imyaka 10, wakomeretse mu mutwe, Habiyakare Anastase, na Nyiransabimana Agnes, bo mu murenge wa Kinigi mu kagali ka Kampanga, ndetse na Nyiraburiza Beatrice n’umwana witwa Maombi yari ahetse wakomeretse ku kaboko bo mu murenge wa Musanze.

Imbogo zari zasohotse muri parike ari nyinshi, ariko imwe gusa niyo yabashije kujya mu baturage ikomeretsa aba bantu, ndetse inangiza imyaka y’abaturage. Abakomeretse bose bahise bajyanwa kwa muganga; nk’uko bitangazwa n’umuyobozi w’umurenge wa Musanze, Sebashotsi Jean Paul.

Prosper Uwingeri, umuyobozi wa pariki y’ibirunga, avuga ko hafashwe ingamba zo kugabanya uburyo inyamaswa zambuka parike zikaza konera abaturage, bafatanya n’amakoperative ashinzwe kubaka urukuta rugabanya imirima y’abaturage na parike.

Uwingeri avuga kandi ko iyo inyamaswa zigerageje kwambuka zisubizwa muri parike, gusa ngo si kenshi inyamaswa igera mu ga santere nk’uko iyi mbogo yabigenje. Avuga kandi ko hari itegeko riteganya ko uwononewe n’inyamaswa ivuye muri parike yishyurwa, bityo abakomeretse ndetse n’abangirijwe imyaka bakaba bazishyurwa n’ikigega cyashyizweho.

Ati: “Dukorana n’amashyirahamwe y’abubaka urukuta rutandukanya parike n’imyaka y’abaturage. Aya mashyirahamwe kandi tuyatera inkunga, kugirango arusheho kunoza imikorere, akanadufasha mu bijyanye no gusana igice cy’urukuta aho inyamaswa ziba zangije”.

Uyu muyobozi, avuga ko kuva mu myaka itatu ishize, batangira gukoresha urukuta rutandukanya parike n’imyaka y’abaturage umubare w’inyamaswa zangiza imyaka y’abaturage wagabanutse cyane.

Jean Noel Mugabo