Inzu ya mbere yafashwe n’inkongi y’umuriro ni iya Dismas Muhawenimana utuye mu Mudugudu w’Amahoro mu Kagali ka Kimihurura, Umurenge wa Kimihurura mu Karere ka Gasabo.

Uwo muriro w’amashanyarazi watewe na sirikwi wangije gusa igikoni, Ishami rya Polisi rishinzwe gukumira inkongi z’umuriro ritabara inzu nini na yo yari yafashwe n’inkongi y’umuriro.

Muhawenimana yashimiye Polisi gutabara vuba bituma igice cy’inzu ye nini kitadakongoka kandi yafashwe.

Indi nzu yahiye ni ya Nsengimana iri mu Kagali ka Nyabugogo, Umurenge wa Muhima mu Karere ka Nyarugenge. Inzu yarahiye irakongoka.

Umuvugizi wa Polisi mu Mujyi wa Kigali, Supt. Albert Gakara ahamagarira abashaka gushyira umuriro w’amashanyarazi mu nzu gukoresha abantu babifite ubumenyi kandi babyize kugira ngo birinde inkongi z’umuriro w’amashanayarazi.

Yagize ati: “Bamwe bakoresha abatekinisiye mu gushyira umuriro w’amashanyarazi mu nzu zabo ntibakurikirane uko byakozwe mu gihe hari abakoresha abakozi batabisobanukiwe neza cyangwa bagakoresha ibikoresho bibi.”

Mu minsi ishize, mu Mujyi wa Kigali, inzu zirimo n’inzu z’utubyiniro (night clubs) ndetse n’ibintu birimo zafashwe n’inkongi z’umuriro zirashya zirakongoka.

Igihe habaye inkongi y’umuriro, Polisi ikangurira abantu kuyihamagara kuri izi numero 0788311120, 0788311224 na 122 kugira ngo itabare hakiri kare.

Nshimiyimana Leonard