Abo basore bakora ibikorwa byo kwambura abagenzi biyise “abamarine” bafite imyaka 27 kumanura bafatiwe ahitwa Gitikinyoni, Yanzi na Kiruhura. Ubu bacumbikiwe mu Kigo cy’inzererezi cya Gikondo; nk’uko Polisi y’igihugu ibitangaza.

Amakuru dukesha polisi avuga ko ako gaco k’amabandi kasohotse mu ndiri gakunda kwihishamo kubera imvura nyinshi yateye umwuzure mu gishanga cya Nyabugogo mu minsi ishize.

Polisi yashyizeho ingamba zikarishye zo guta muri yombi abanyabyaha bagashyikirizwa ubutabera kugira ngo baryozwe ibyo bakoze; nk’uko bitangazwa n’umuvugizi wa Polisi mu Mujyi wa Kigali, Supt. Albert Gakara.

Supt. Gakara atangaza ko ku bufatanye n’abaturage bakoze urutonde rw’abantu bakekwaho ubujura bityo umukwabu ukaba wari ugamije guta muri yombi abateza umutekano muke bambura abagore n’abakobwa.

Polisi ntishobora kurebera abo banyabyaha, ahubwo iracyashakisha n’abandi babaciye mu rihumwe ngo na bo batabwe muri yombi; nk’uko umuvugizi wa Polisi mu Mujyi wa Kigali akomeza abitangaza.

Yasabye abaturage gukomeza ubufatanye n’inzego zishinzwe umutekano mu rwego rwo gukumira ibyaha bitaraba.

Nshimiyimana Leonard