Basabye uwari uyitwaye kuyikomezanya kuri stasiyo ya polisi ya Mukarange, ageze mu mujyi wa Kayonza rwagati aho gukata ajya kuri stasiyo ya polisi imodoka ayiha umuriro akomeza i Kibungo.

Umupolisi yahise amukurikira na moto, umushoferi ava mu muhanda wa kaburimbo akatisha imodoka mu gahanda k’igitaka, birangira ageze aho imodoka itabashaga kurenga ayivamo akizwa n’amaguru.

Uwo mushoferi yavuye mu modoka ariruka ntiyanayishyiramo feri, isubira inyuma ku buryo yari igiye kugonga umupolisi wari umukurikiye. Ku bw’amahirwe iyo modoka yahise igonga umukingo irahagarara ntiyagira ibyo yangiza.

Amakuru dukesha polisi ikorera mu karere ka Kayonza avuga ko uwari utwaye iyo modoka atamenyekanye, ubu hakaba hakiri gukorwa iperereza kugira ngo hamenyekane byinshi ku bijyanye n’iyo modoka.

Iyo modoka yahise ijya gufungirwa kuri stasiyo ya polisi ya Mukarange mu karere ka Kayonza, mu gihe hagitegerejwe umuntu uzaza kuyireba avuga ko ari iye.

Cyprien M. Ngendahimana