Mukambabazi utuye mu mudugudu wa Mushubati, Akagali ka Gisozi mu Murenge Nemba Akarere ka Gakenke yabyaye uruhinja rushyitse mu ijoro rishyira tariki 21/04/2013 arangije ararwica arujugunya mu rutoki arenzaho ifumbire y’imborera kugira ngo abantu batarubona. Uruhinja rwabonetse ku cyumweru saa munani z’amanywa.

Uyu mugore utemera ko yabanje kwihekura, yatangarije Kigali Today ko afite umwana umwe w’imyaka itanu yabyaranye n’umugabo we ubu ufungiye muri Gereza ya Musanze aho akora igihano cy’imyaka itanu yakatiwe n’urukiko nyuma yo gusambanya umukobwa ku gahato.

Akomeza asobanura ko icyamuteye kwihekura ngo ni uko yatekereza uko umugabo we azabyakira afunguwe. Agira ati: “Ikintu cyabinteye, navuze ngo (umugabo) naza nzagana he ntagira iwacu, mpita mbikora gutyo (kwihekura).”

Mukambabazi yihekuye atinya umugabo we ufunze. (Foto:L. Nshimiyimana)

Uyu mugore avuga ko icyo gikorwa cya kinyamaswa cyamenyekanye ari uko muramu we ukiri umwana umuraza yumvise uruhinja rurira nijoro maze abibwira ababyeyi be ari ho kwa nyirabukwe.

Mukambabazi agira inama abandi bashobora gutwara inda abagabo babo badahari kwirinda gukuramo inda cyangwa kwihekura ahubwo kugira ubutwari bwo kuzibyara bagasaba imbabazi abagabo babo, banabirukana bakirwanaho mu buzima kuko bafite amaboko abiri.

Ingingo ya 314 y’igitabo cy’amategeko ahana mu Rwanda isobanura ko ubwicanyi cyangwa ubuhotozi bigiriwe uruhinja mu ivuka ryarwo cyangwa rukimara kuvuka byitwa kwihekura. Kubyita ubwicanyi cyangwa ubuhotozi biterwa n’uburyo byakozwe. Uyu mugore ahamwe n’icyaha yahanishwa igifungo cya burundu.

Nshimiyimana Leonard