Musabyimana yari mu bwato burimo abantu 56 buvuye ku Kibuye buje mu karere ka Rubavu ahitwa Brasserie ariko kubera imvura nyinshi yaguye igatera umuhengeri mu kiyaga cya Kivu, byatumye icyuma cya moteri y’ubwato gipfa maze ubwato burahagarara ubwo bwari buri hafi kugera ku nkombe.

Uku guhagarara k’ubwato kandi bwugarijwe n’umuhengeri byatumye Musabyimana yitangira abo atwaye ajya gushaka aho abuhambira ngo babukurure ariko ku bw’amahirwe macye umuhengeri umurusha imbaraga amazi aramutwara; nk’uko bitangazwa na Ngarukiyinka Francois bari kumwe.

Nkurikiyinka avuga ko bari babuvuyemo ari babili ariko undi yashoboye gufata ku biti amazi ntiyamujyana, akemeza ko impanuka bagize itatewe no kwikorera cyane ahubwo ngo byatewe n’umuhengeri mwinshi wari mu kiyaga cya Kivu utewe n’imvura kuko bari bambaye imyenda irinda abantu kwibira.

Umuvugizi wa polisi mu ntara y’uburengerazuba avuga ko bitemewe ko ubwato bugenda mu Kivu mu masaha y’ijoro. Yongeyeho ko hagiye kongerwa gukorwa ubuvugizi nkuko bisanzwe bikorwa mu kubuza abakoresha inzira y’amazi kugenda n’ijoro ariko ngo bagiye gukaza amarondo mu mazi.

Ubwato bwakoze impanuka bwari bwavuye Karongi ku manywa ariko buza gutinda mu mazi bituma bugera Gisenyi bwije, ngo kugira ngo ubwato butazongera gutinda mu mazi haratekerezwa amasaha ubwato bugomba guhagurukira kugira ngo butarara bugenda mu mazi kuko iyo bugize impanuka bubura ubutabazi.

Sylidio Sebuharara