Saa tatu za mu gitondo kuri uyu wa kabiri tariki 26/06/2012, Bus ya KBS yaturukaga mu mujyi wa Musanze igana mu Cyanika mu karere ka Burera yabisikanye na Taxi Mini Bus yaganaga i Musanze ivuye Cyanika maze ihita igonga abantu babiri bari bahagaze iruhande rw’umuhanda.

Bus ya KBS yazamutse ifite umuvuduko mwinshi maze ibonye igiye gukubitana na Taxi irayikatira ihita igonga umunyegare waruhagaze ku ruhande rw’umuhanda ndetse n’umukobwa nawe wari uri hafi y’umuhanda; nk’uko Bimenyimana Alphonse wiboneye neza iyo mpanuka iba abisobanura.

Abo bantu bagonzwe bakomeretse bikomeye bahita bajyanwa mu bitaro bya Ruhengeri. Bus yabagonze yahise ita umuhanda ijya munsi yawo ariko abagenzi bari bayirimo bo ntacyo babaye.

Bus ya KBS yataye umuhanda igwa munsi yawo.

Ubwo umunyamakuru wa Kigali Today yageraga aho impanuka yabereye yasanze Bus ya KBS ifite nimero za puraki RAB932Y yagonze abo bantu iri munsi y’umuhanda ihagaze (ariko bagiye kuyihakura), aho yari yanagonze ibiti ndetse n’amabuye bikikije imirima iri hafi y’umuhanda.

Igare umunyegare wagonzwe yari atwaye naryo ryari riri hepfo y’umuhanda ryagoramye, rirambitse iruhande rw’ibijumba uwo munyegare yari ahetse.

Abandi babonye iyo mpanuka iba bavuga ko bus ya KBS yari ifite umuvuduko mwinshi bakurikije uburyo yagonze abo bantu yarangiza nayo igahita ita umuhanda ikagwa hepfo yawo.

Igare ryari ripakiye ibijumba birameneka ndetse n’umupine w’imbere uragorama.

Umuhanda wa Musanze-Cyanika ni muto mu bugari ku buryo nta n’ahantu hagenewe abanyamaguru hagaragara. Ibyo bituma abanyamaguru bawukoresha bagendera mu muhanda rwagati.

Abashoferi batandukanye bakoresha uwo muhanda bavuga ko abaturiye uwo muhanda usanga batawukoresha uko bikwiye kuko bagendera ahagenewe kugenda imodoka.

Umuhanda Musanze-Cyanika ubamo abagenzi benshi. Uwo muhanda ugana ku mupaka uhuza u Rwanda na Uganda uri mu Cyanika. Sosiyete itwara abantu ya KBS ifiteyo imodoka zitwara abantu.

Norbert Niyizurugero