Iki gisasu cyatoraguwe n’abana hafi y’urugo rw’aho cyaturikiye. Mbere y’uko giturika, abana bagitoraguye babanje kugikinisha, bagikura aho bagitoraguye bakijyeza ku rugo rwari hafi yaho ari naho cyaturikiye; nk’uko bamwe mu bo twahasanze babidutangarije.

Umukobwa w’imyaka 14 icyo gisasu cyahitany, abandi bana bamusanze ari guhata ibirayi yicaye ku irembo iwabo. Abandi bana bane barimo Djamidu, Ndagije, Harerimana na Niyonkuru bakomeretse bahita berekezwa ku bitaro bya Ruhengeri.

Amakuru twaje kumenya nyuma ni uko bamwe muri bo borohewe ku buryo banasubijwe mu rugo. Ubuyobozi bw’akarere bwifatanije mu kababaro n’umuryango wabuze umwana ndetse bunihanganisha n’abandi bafite abakomeretse.

Umugabo w’imyaka 44 yakubiswe n’inkuba ahita yitaba Imana

Mu karere ka Nyabihu kandi umugabo w’imyaka 44 witwa Ntibanyurwa Innocent wari utuye mu karere ka Nyabihu mu murenge wa Shyira yakubiswe n’inkuba ahita yitaba Imana ubwo imvura yagwaga.

Uyu nyakwigendera asize umugore n’abana batanu; nk’uko Agronome w’umurenge wa Shyira Ir Maguru Aloys yabidutangarije ku murongo wa telefoni.

Umunyamabanga nshingwabikorwa w’umurenge wa Shyira, Rurangwa Manzi, yadutangarije ko bifatanije n’umuryango w’uyu mugabo witabye Imana kandi bakaba bifatanyije nabo mu kumushyingura.

Si ubwa mbere inkuba ikubita abantu mu murenge wa Shyira kuko muri uyu mwaka Agronome Maguru Aloys yadutangarije ko nabwo inkuba yakubise abantu mu kagari ka Kamiranzovu bajyanwa ku bitaro bya Shyira barakira.

Safari Viateur