Kabanyana Chantal watawe muri yombi bivugwa ko yabyaye umwana w’umuhungu ku wa mbere tariki 30/07/2012 ahagana mu masaha ya cyenda z’umugoroba akamuta mu musarane.

Abaturage baturanye n’uwo mukobwa bumvise urusaku maze bashaka kumenya aho ruvugiye baza kugera kuri uwo mwana mu bwiherero; nk’uko bitangazwa na polisi yo muri Nyagatare.

Nyuma y’uko polisi ihawe amakuru, yahise ihagera maze itwara umwana na nyina kwa muganga ngo bitabweho, gusa umwana yaje gupfa nyuma y’amasaha atandatu kuko yari afite ibibazo by’ubuhumekero.

Kabanyana wemera icyaha ariko akavuga ko atari agambiriye kwica umwana we yagize ati: “nagiye mu bwiherero nk’ibisanzwe sinari ngamije kwica umwana wange”.

Umuvugizi wa polisi y’igihugu, Supt. Theos Badege, yagaye ibyo bikorwa bya kinyamaswa. Yagize ati: “biragoye kumvikana ukuntu umuntu agira uruhare mu kwica umwana we”.

Naramuka ahamwe n’icyaha, Kabanyana azahanishwa igifungo kiri hagati y’umwaka umwe n’imyaka itatu anacibwe ihazabu y’amafaranga ari hagati y’ibihumbi 50 n’ibihumbi 200; nk’uko biteganywa n’amategeko ahana.

Emmanuel Nshimiyimana