Bayavuge uri mu kigero cy’imyaka 50 y’amavuko yakubiswe n’inkuba mu ma saa cyenda z’amanywa ubwo yari mu muhanda agenda, icyo gihe imvura irimo kugwa.

Muri uwo muhanda hahise hanyura imodoka iramutoragura imujyana ku kigo nderabuzima cya Kinunu giherereye mu murenge wa Boneza mu karere ka Rutsiro.

Umunyamabanga nshingwabikorwa w’umurenge wa Boneza, Deogratias Rutayisire, wabashije kugera aho uwo mugore yari arwariye yavuze ko inkuba yamutwitse ku kaboko no ku rubavu, akaba yari ari kwitabwaho n’abaganga ku buryo hari ikizere cy’uko aza koroherwa.

Akarere ka Rutsiro ni kamwe mu turere muri iyi minsi twibasiwe n’inkuba. Mu mezi abiri ashize abantu babiri barapfuye. Habonetse abandi icyenda barimo abahungabanye n’abakomerekejwe n’inkuba mu bihe bitandukanye.

Ibikoresho birimo za mudasobwa na byo byarahiye, amwe mu matungo arimo inka na yo arapfa yishwe n’inkuba.

Malachie Hakizimana