Mu karere ka Rutsiro, icyemezo cyo guhagarika uburobyi mu kiyaga cya Kivu cyatangiye gushyirwa mu bikorwa guhera ku itariki 02/08/2012 kugeza tariki 02/10/2012.

Imitego y’amafi itemewe harimo iyitwa kaningini ifata amagi ndetse n’udufi duto, ndetse hakabaho n’abakoresha inzitiramibu.

Mu bafunzwe, bane bakomoka mu murenge wa Boneza, batatu ni abo mu murenge wa Kigeyo, naho abandi batandatu bakomoka mu murenge wa Kivumu; nk’uko bitangazwa n’ubuyobozi bwa Polisi icunga umutekano mu kiyaga cya Kivu.

Bamwe muri bo bakatiwe igifungo kigera ku mwaka nyuma y’uko bigaragaye ko barenze ku itegeko rigenga uburobyi bwemewe mu kiyaga cya Kivu. Amabwiriza agenga uburobyi mu Kiyaga cya Kivu yarushijeho gukomera kuko mbere uwafatwaga yacibwaga amande angana n’ibihumbi 50.

Intara y’Uburengerazuba yafashe umwanzuro wo guhagarika uburobyi mu kiyaga cya Kivu mu gihe kingana n’amezi abiri, kugira ngo umusaruro w’ibikomoka ku burobyi mu kiyaga cya kivu wiyongere kuko ngo wari umaze kugabanuka cyane.

Umuyobozi w’akarere ka Rutsiro, Byukusenge Gaspard, avuga ko iyo icyo cyemezo kidafatwa, amafi mu kiyaga cya Kivu yashoboraga no gucika burundu.

Yatanze urugero ati : “hari uwambwiye ko mbere ikipe yabo yajyaga yinjiza amafaranga agera kuri miliyoni enye ku kwezi, ariko ubu ngo bari basigaye batageza no ku bihumbi 400 cyangwa 500”.

Malachie Hakizimana