Ubwo umuyobozi w’akarere ka Rusizi, Nzeyimana Oscar , yagiranaga inama n’abanyamadini bose bo muri aka karere tariki 24/06/2013 yabasabye kuyobora abayoboke babo neza kuko ngo kuba bajya mu mihanda bagatera abaturage ubwoba bihungabanya umutekano.

Aha kandi yashishikarije aba banyamadini kujya basaba abo bahanuzi guhanura ibintu byiza bitarimo iteramboba kuko aribyo byubaka igihugu.

Abanyamadini n’amatorero basabwe kureka amahanuzi y’iterabwoba.

Bamwe muri aba bapasitori barimo barimo Lazari Byamungu batangaza ko muri iki gihe hari abakirisitu bameze nk’inzuki zataye umuzinga wazo. Aha ashaka kugaragaza ko abo bayoboke biyita abahanuzi abenshi baba barataye amatorero yabo bakajya gushaka imibereho hanze y’itorero batetse umutwe.

Abapasiteri batangaje ko bagiye kubakurikirana ariko kandi basaba ubuyobozi bw’inzego z’umutekano kubafasha guhashya abo bahanuzi.
Ibindi aba banyamadini basabwe ni ugucika ku masengesho y’ijoro atemewe kimwe n’abasengera mu byumba bitazwi biherereye kuko ngo bibangamira umutekano w’abaturage.

Umuyobozi w’akarere yabwiye abanyamadini kujya basaba uburenganzira bwo gusenga ninjoro bagasubizwa n’ubuyobozi mbere yo kubikora kimwe n’abihugika bakajya mu byumba bitemewe.

Musabwa Euphrem