Iyo modoka ifite pulake RAB 017 I yari irimo abantu 16 na shoferi yavaga mu karere ka Musanze yerekeza muri Gisenyi. Abitabye Imana ni umusirikare Mutabazi John wari ufite imyaka 44 y’amavuko na Bihoyiki Thadee w’imyaka 65 wari utuye ahitwa i Mahoko mu murenge wa Kanama.

Polisi y’igihugu yahise itabara, abakomeretse bose bajyanwa mu bitaro bya Gisenyi. Dr Habimana Emmanuel uri kubakurikirana yatangaje ko abo babiri bakomeretse cyane bajyanwe guca mu cyuma kandi ko bari koroherwa. Hari n’abandi bane bavuwe bahita bataha. Abasigaye bose baracyari gukurikiranwa mu bitaro.

Umwe mu barokokeye muri iyo mpanuka, Haguma Joseph, avuga ko iyi modoka yatangiye kugira ibibazo ubwo umugenzi yashatse kuviramo kuri hoteli Peace Land imodoka ikabura feri.

Haguma akomeza avuga ko abagenzi babwiriraga shoferi rimwe ngo nakomeze kugenda ntahagarare ariko bakimara gukata ikorosi ryo kuri sitasiyo yegereye ibitaro shoferi ahita agonga igipangu cy’ibitaro.

Abari bahari impanuka iba bemeza ko babonye umuntu avamo agafata moto bagakeka ko ari uwo mushoferi, abandi bavuga ko shoferi ari umwe mu bitabye Imana kuko hari uwo basanganye uruhushya rwo gutwara imodoka, kugeza ubu amakuru ye ntaramenyekana.

Pascaline Umulisa