Mu gikorwa cyo gufungura amahugurwa y’abayobozi bakuru muri Polisi ziturutse mu bihugu 12 muri aka karere, kuri uyu wa gatatu tariki 22/08/2012, IGP Gasana yavuze ko bifuza gushyiraho imikoranire ibereye akarere kubera ubugizi bwa nabi bugaragara muri iki kinyejana cya 21.

Yagize ati: “Intego yacu ni ukugira akarere aho abaturage bishimira amahoro n’umutekano birangwamo”.

Yavuze ko nubwo umuryango polisi zo muri ako karere zihuriyemo (EAPCO) ukorera mu karere gusa, Polisi Mpuzamahanga (Interpol) ibafasha mu guhuza n’ibindi bihugu ku rwego rw’isi.

ICP Martin Amoru, wungirije umuyobozi wa Polisi ya Uganda, witabiriye aya mahugurwa ahuriyemo aba ofisiye bagera kuri 60, yavuze bari kwiga uburyo bagabanya imbogamizi zituma polisi zo mu bihugu byose bigize uyu muryango zidakorana neza.

Hari byinshi polisi zo mu karere k’Afurika y’Uburasirazuba zagezeho nko guhererekanya amakuru y’abakekwaho iterabwoba n’abafashwe, abagurisha abantu n’ibindi byaha ndenga mipaka; nk’uko ICP Amoru yakomeje abivuga.

Aya mahugurwa azarangira tariki 26/08/2012, ni n’umwanya mwiza wo gushaka umuti ku byaha ndengamipaka bimaze kuba byinshi muri aka karere; nk’uko Minisitiri w’Umutekano, Musa Fazil Harelimana, yabitangaje ubwo yayafunguraga ku mugaragaro.

Emmanuel N. Hitimana