Uyu musore ngo yinjiye muri iyi banki mu masaha ya saa sita yambaye ikintu gituma atamenyekana mu maso. Akigera muri banki, ngo yahise atunga ya mbunda ye abantu bose bari bayirimo, anasaba umuntu wari uri gutanga no kwakira amafaranga kuyashyira mu gikapu cye.

Ubwo umukozi ushinzwe isuku yasakuzaga asaba ubufasha, uyu mujura yabonye ko abantu bose hanze babimenye batangiye gushaka kwinjira nawe arwana asohokera mu wundi muryango, ariko aza gufatwa n’uwitwa Nizeyimana Jullius, umuturage wo mu murenge wa Gitega afatanije n’undi muturage.

Igikinisho cy’imbunda Salim yakoresheje yiba.

Ubwo yafatwaga, uyu musore yari yasize amafaranga ndetse n’intwaro ye muri banki imbere.

Abajijwe impamvu y’ubu bujura, Soko Salim yatangaje ko yabihatiwe n’abandi bantu babiri. Ku munsi ubanziriza ubu bujura, ngo uyu muhungu yari yagaragaye mu Biryogo agura irangi ry’umukara, bishoboka ko ariryo yasize kuri iki gikinisho cy’imbunda yitwaje.

Umuvugizi wa polisi y’igihugu, Supt Theos Badege, araburira urubyiruko kureka ibikorwa binyuranyije n’amategeko kuko ngo bishobora kubateza ibibazo.

Yabasabye gukoresha amahirwe bahabwa na Leta bubaka ejo hazaza habo heza, bakora cyane.

Yanashimiye kandi uruhare abaturage bagira mu guta muri yombi abanyabyaha no gukumira ibyaha.

Emmanuel Nshimiyimana