Umugabo amazina ntiyabashije kumenyekana bitewe n’isindwe rivanze n’inkoni nyinshi yakubiswe agahinduka inoge.

Nk’uko abasanze uyu mugabo akubitwa babivuga ngo umukozi wo muri ako kabari yanyarukiye mu cyokezo kureba mushikaki (brochette) yarasabwe kokereza abakiriya n’uko agarutse yakizwa inkuru mbi imubwira ko hari umukiriya umuciye mu rihumye akagenda atishyuye inzoga zose yanyoye.

Umwe muri abo bantu bari bamukikije akubitwa abivuga atya: “Umukozi wa Rugerinyange François yamwirutseho amufata atararenga umutaru n’uko ahita amukubita umutego umusinzi yitura hasi agaramye”.

Yari yasinze amaso yatukuye.

Amaze kugera hasi Ugeziwe Louis (umukozi wa Rugerinyange François) yahise atangira kumutera imigeri akananyuzamo akamukurura hasi abandi bari hafi ye bamwogaza.

Ubwo uwo musinzi yari amaze kuba inoge inzego z’umutekano zatabariye bugufi n’uko uwo musinzi abasha kuva mu menyo ya rubamba atyo nk’uko umwe mu bakurikiraniraga hafi iyo mirwano abitangaza.

Akomeza abivuga atya: “Iyo inzego z’umutekano zidatabarira hafi uriya musinzi yari bunapfe kuko kubera inzoga nyinshi yari yanyoye nta kwirwanaho yari agifite”.

Uyu musinzi amaze gutabarwa n’inzego z’umutekano nawe yahise azishyikiriza ikirego ashinja umukozi w’akabari yanywereyemo kumwiba telefoni ye igendanwa maze impande zombi zitangira kwitana ba mwana.

Yaba uwo musinzi hamwe n’umukozi wo muri ako kabari wishyuzaga inzoga zanyowe ntacyo batangarije umunyamakuru kuko byari bikiri rwaserera yagira uwo abaza muri bo akamwitakana.

Abantu bari bahuruye nk’abatashye ubukwe.

Inzego z’umutekano zabafashe bombi bajyanwa kuri station ya polisi ya Busasamana mu karere ka Nyanza kugira ngo ibyabo bishobore gukurikiranwa mu nzira zemewe n’amategeko.

Polisi y’igihugu ikorera mu karere ka Nyanza ihora isaba abatuye muri aka karere kimwe n’abahagenda kwirinda ibisindisha n’ibiyobyabwenge ariko bikomeje kwigarurira abantu batari bake bikabakururira ubusinzi butihishiriye n’ubwiyandarike.

Jean Pierre Twizeyeyezu