Ibyo byabaye ubwo Polisi yo mu karere ka Nyanza yari mu mukwabo mu murenge wa Ntyazo maze igeze mu iduka rya Habimana Emmanuel ahereza ruswa umupolisi witwa AIP Ernest Ruzindabagabo ariko we yanga kuyakira ahubwo amuta muri yombi.

Habimana ucumbikiwe ubu kuri poste ya Polisi ya Ntyazo yemera icyo cyaha cy’itangaruswa yafatiwemo akavuga ko yari aziko bitaza gufata intera byafashe ngo agezwe muri kasho nk’uko Supt Jules Rutayisire uyoboye Polisi y’igihugu mu karere ka Nyanza abivuga.

Agira ati: “Umupolisi wacu yinjiye mu nzu ya Habimana n’uko undi amwakiriza ruswa kuko yari aziko afite amashahi yaciwe mu Rwanda ariko kuko abapolisi bacu batojwe kwirinda ruswa n’ibifitanye isano nayo yayanze ahitamo kumuta muri yombi kugira ngo umwuga we atawuhesha isura mbi”.

Icyaha cy’itangaruswa gihanishwa igihano cy’igifungo kuva ku myaka ibiri kugeza ku myaka itanu n’ihazabu y’amafaranga yikubye inshuro ebyiri kugeza ku icumi y’indonke yatanze nk’uko ingingo ya 14 y’itegeko N0 23/2003 ryo ku wa 07/08/2003 ryerekeye gukumira, kurwanya no guhana ruswa n’ibindi byaha bifitanye isano nayo ibivuga.

Jean Pierre Twizeyeyezu