Uyu mwana yarohamye ahagana saa tanu n’igice z’amanywa ubwo yari arimo koga muri iki kiyaga. Kuva icyo gihe batangiye gushakisha umurambo we ariko kugeza ubwo twakoraga iyi nkuru ku mugoroba wa tariki 03/06/2013 wari utaraboneka.

Ikiyaga cya Kivu gikunze guhitana ubuzima bw’abantu barohamamo, by’umwihariko abana bakiri batoya baba bagiye kogamo kandi batabizi.

Bitewe n’uko imirenge 10 yo mu karere ka Nyamasheke ikora ku Kiyaga cya Kivu, ababyeyi ndetse n’inzego zitandukanye bahora bibutswa ko bakwiriye kubungabunga umutekano w’abana, by’umwihariko babarinda gukinira ku nkombe z’iki kiyaga kugira ngo batagwamo.

Iyi ngingo igamije kurwanya kurohama mu kiyaga cya Kivu yanagarutsweho mu nama y’umutekano yaguye y’akarere ka Nyamasheke yateranye ku wa 31/05/2013.

Umuyobozi w’akarere ka Nyamasheke, Habyarimana Jean Baptiste, yasabye ko inzego zose kuva ku rwego rw’umudugudu zarushaho kurwanya impanuka zibera muri iki kiyaga ndetse n’abantu bakuru bajyamo koga bakitwaza imyambaro yabugenewe ituma umutu atarohama; ndetse yaba arohamye bikoroha gutarura umurambo we kuko uba ureremba.

Emmanuel Ntivuguruzwa