Uyu mwanzuro ufashwe mu gihe ibyinshi mu bibazo biteza umutekano muke, by’umwihariko nk’ibyaha by’ubusambanyi ku ngufu n’urugomo bikunze gukomoka ku kibazo cy’ubusinzi.

Umunyamabanga Nshingwabikorwa w’Umurenge wa Bushekeri, Eloi Munyankindi, yasabye abitabiriye inama, by’umwihariko abayobozi b’imidugudu, gukurikirana ishyirwa mu bikorwa ry’uyu mwanzuro kugira ngo amasaha y’ifungwa ry’utubari yubahirizwe.

Uyu muyobozi avuga ko hagiye gukazwa ingamba zirimo n’ibihano ku batazubahiriza aya mabwiriza.

Mu tubari dutandukanye two mu bice by’icyaro, byakunze kugaragara ko tutubahiriza amasaha y’ifunga n’ifungura ku buryo ahenshi usanga banafungura utubari mu masaha ubusanzwe yagenewe indi mirimo.

Iki kibazo gikunze guteza ubusinzi mu baturage akenshi bubakoresha ibikorwa by’urukozasoni. Ikindi ni uko ubu businzi buba intandaro yo kudindira mu iterambere mu gihe amasaha bagakoresheje mu bikorwa bnibateza imbere usanga bayamara bibereye mu kabari.

Ubu businzi kandi bukunze no kuba intandaro y’amakimbirane yo mu miryango kuko abenshi mu bizihirwa n’utubari cyane, abaturage bavuga ko basubira inyuma bagasahura n’umutungo wo mu ngo kugira ngo babone ayo banywera.

Iyi nama yitabiriwe n’inzego zitandukanye zikorera muri uyu murenge, zirimo abashinzwe umutekano, abayobozi b’utugari n’imidugudu, abayobozi b’Ibigo by’amashuri, abahagarariye inkeragutabara, abakuriye udusantere tw’ubucuruzi n’abandi bafite aho bahuriye n’umutekano.

Emmanuel Ntivuguruzwa