Ababonye uyu murambo bemeza ko Mukashema Therese yishwe atemwe mu ijosi no ku bikanu. Kugeza ubu uwishe uyu mukobwa ntabwo yari yemenyekana gusa hari abatawe muri yombi bakekwa kuba aribo bamwishe.

Amakuru dukesha abaturanyi ba nyakwigendera atangaza ko yishwe ku gicamusi cyo ku itariki ya 08/08/2012 akicirwa mu ishyamba ry’umugabo witwa Nkurunziza David aho yari yagiye gutashya inkwi.

Nyiri ishyamba nawe akekwaho kuba yarishe uyu mukobwa kuko ngo yakundaga no kuvuga ko umuntu uzamugerera mu ishyamba azamwica.

Ntawukuriryayo Evalitse, umuturanyi wa nyakwigendera yatangarije Kigali Today ati “ngo yahoraga [Nkurunziza] avuga ngo uwo mukobwa ajya gutora inkwi mu ishyamba rye ngo akanamusoromera n’intoryi kandi ngo akavuga ko azamwica.”

Nkurunziza ahakana ko ariwe wishe uyu mukobwa gusa iperereza ryo riracyakomeje. Umurambo wa nyakwigendera wo warangije gushyingurwa nyuma yo gukorerwa ibizami kwa muganga.

Nyuma y’uru rupfu rwa Mukeshimana, ubuyobozi bw’akarere ka Nyamagabe bwagenderereye abaturage bo mu murenge wa Musebeya kuri uyu wa mbere tariki 13/08/2012 bubasaba gufatanya n’inzego z’umutekano mu gucunga umutekano wabo.

Mugisha Philbert, umuyobozi w’akarere ka Nyamagabe yasabye abaturage ati “mudufashe kubacungira umutekano, buri wese abe ijisho rya mugenzi we kandi muduhe amakuru ku gihe”.

Umurambo wa Mukeshimna wabonetse nyuma y’iminsi 4 habonetse undi murambo w’umusaza w’imyaka 70 witwa Simbiga Justus mu murenge wa Buruhukiro. Uwo murambo w’umusaza wabonetse hafi y’ishyamba rya Nyungwe nyuma y’ibyumweru bibiri yaraburiwe irengero.

Jacques Furaha