Urugo Uwimana yashatsemo mu mwaka wa 2009 yarusanzemo abana bari bamaze kubura nyina kubera urupfu. Yatangiye gukekwaho amarozi muri kanama umwaka wa 2012 ubwo uwitwa Gahurire wari n’umuyobozi w’uyu mudugudu yitabaga Imana aguye mu bwato bw’inka zinyweraho.

Ise w’uyu muhungu ariko n’ubwo ahakana ko umugore ariwe wamuroze, yemera ko yahawe amata nijoro na mukase bugacya amubwira ko aribwa mu nda, akitaba Imana umunsi utararenga. ‘Ngo niba aroga ubwo yabyize nyuma yo gutandukana nanjye naho ubundi ntabyo narinsanzwe muziho pe!’

Uku kubeshyerwa kandi nibyo bivugwa na nyiri ugukekwaho uburozi n’ubwo yafatanywe agapfunyika. Kuri we ngo aka gapfunyika yafatanywe karimo amase y’imvubu ngo yari yabikijwe n’umuntu washakaga kuyashyira mu murima ngo agatuma abasha kweza imyaka myinshi. Gusa ariko yemera ko we atari yayakoresha.

Nyuma yo kubihakana ariko yasomewe inyandiko yateyeho igikumwe akigezwa muri kasho y’umurenge wa Tabagwe, yemera ko yishe Gahurire ndetse akaba ariwe uroga Mukakabera Donatila, maze atubwira ko yashutswe n’abandi bantu dore ko n’aba akekwaho kuroga yivugira ko ntacyo bapfa.

Ngo asaba imbabazi z’ibyo yakoze kandi ngo akaba atazabyongera kuko ngo yarabimazemo umwaka umwe gusa.

Ku rundi ruhande ariko abaturage twaganiriye badutangarije ko Gahurire yazize ko yanze ko Uwimana asezerana na se umubyara mu mitungo ya nyina, akaba yaramubangamiraga mu kugurisha inka ndetse ngo no kuba yaraketsweho gutera inda umukobwa Uwimana yatahanye kwa se, n’ubwo yaje guhanagurwaho iki cyaha na nyiri ukuyiterwa wivugiye ko atariwe wayimuteye.

Gusa ngo Uwimana akigera mu mudugudu wa wabo hashize amezi abiri gusa bamenya ko ari umurozi kuko ngo aho yari ari mu murenge wa Rwempasha aribyo yirukaniweyo.

Gukeka ariko n’ubundi ngo ni ugukeka. Kabera Theoneste umuyobozi w’umudugudu wa Gakamba yadutangarije ku kumurongo wa Telefone ko adasanzwe aziho Uwimana Faraziya uburozi ahubwo we agakeka ko ari inzangano zaba ziri hagati y’abaturanyi.

Gusa ariko nanone ngo uku gukeka kwabo n’ubwo kwaba gufite ishingiro ngo baba bakwiye kubigeza ku buyobozi bukaba aribwo bukurikirana ikibazo ariko badashyize umuntu mu majwi bamushinja ibyo badafitiye igihamya.

Uwimana Faraziya w’imyaka 53 y’amavuko yatawe muri yombi tariki 01/02/2013 aturutse mu Bugaragara mu murenge wa Rwimiyaga aho yari amaze iminsi aba kuko yirukanywe mu mudugudu wa Gakamba muri Kanama umwaka ushize nyuma y’urupfu rwa Gahurire yari abereye mu kase kubera gukekwaho kuba ariwe wamwishe.

Nk’uko tubikesha abanyamategeko ngo Uwimana bigaragajwe n’abaganga ko igipfunyika yari afite cyarimo uburozi, yahanishwa ingingo ya 144 y’igitabo cy’amategeko ahana ibyaha mu Rwanda, iteganya igifungo cya burundu ku muntu wahamwe n’icyaha nk’icyo.

Dan Ngabonziza