Mu minsi ishize muri aka karere hamaze iminsi hatemwa abantu batandukanye, bamwe bigenderaga mu nzira cyangwa se babasanze mu ngo zabo. Ariko icyari cyihishe inyuma y’urwo rugomo cyari kitaramenyekana.

Byatangiye mu byumweru bibiri bishize ubwo ahitwa i Gahogo mu murenge wa Nyamabuye, abantu bataramenyekana neza bafataga imipanga bagatema inkeragutabara zigera kuri zirindwi.

Urwo rugomo rwaraye rukomeje mu ijoro ryakeye, ubwo abandi bantu babiri baterwaga nabo bagatemwa n’abagizi ba nabi. Umwe bamutemye mu mutwe undi bamutema ku kaboko.

Gusa nta wigeze apfa kuko ababatemye bashobora kuba babigiriraga nkana bagamije gukomeretsa gusa, nk’uko umwe muri abo batemye yabitangarije Kigali Today. Yagize ati: “Ntawe bambura, nta n’uwo bashimuta, baratema bakagenda”.

Yakomeje avuga ko mu minsi ishize yatangatanzwe n’abantu batatu, agerageje kubarwanya ngo yiruke abacike bamurusha ingufu. Yavuze ko uko yababonye bari bafite umugambi bashaka kugeraho ariko utari uwo kwica.

Ati: “Barantangiriye nshaka kunyura ku ruhande baransatira ngira ngo ni abajura. Narababwiye nti niba ari amafaranga mushaka reka mbahe ayo mfite mundeke nikomereze. Umwe muri bo yankubise inkoni nitura hasi mvuza induru, undi ahita ankubita umupanga mu gahanga”.

Spt. Theos Badege, Umuvugizi wa Polisi y’Igihugu, yatangaje ko bamaze guta muri yombi abantu babiri bakekwaho kuba inyuma y’ibyo bikorwa. Supt. Badege yavuze ko ibyo bafatanywe ari byo byatumye bakekwa.

Ibyo bibaye mu gihe abaraye batemye abantu babiri muri ako gace bateshejwe n’abashinzwe umutekano bafatanyije n’abaturage na Polisi.

Hagati aho iperereza riracyakomeje ndetse no kuri uyu wa mbere tariki 20/08/2012, inzego z’ubuyobozi n’iz’umutekano ziriwe mu nama y’umutekano mu rwego rwo gufatanya ngo icyo kibazo kibonerwe umuti ku buryo budasubirwaho.

Ku kibazo cy’abarara irondo Polisi ivuga ko nta ntwaro yabaha n’ubwo nabo bashobora gusagarirwa, ariko ikongeraho ko izajya ibafasha kunganirwa n’abashinzwe umutekano.

Christian Mugunga