Byiringiro yatawe muri yombi nyuma y’uko umuturage wamubonye yica uyu mugore Mukamana, agejeje amakuru kuri polisi, akanavuga ko yakoresheje umuhoro amwica; nk’uko bitangazwa na Polisi ikorera mu karere ka Kirehe.

Byiringiro wiyemerera icyaha avuga ko yamwishe mu rwego rwo kwihorera kuko yari amaze gupfusha abana be babiri avuga ko barozwe n’uyu Mukamana.

Umuvugizi wa polisi y’igihugu, Supt. Theos Badege, yagaye igikorwa cy’ubunyamaswa cyakozwe na Byiringiro, avuga ko polisi ifite ingamba zo guta muri yombi abanyabyaha bagashyigirizwa ubutabera.

Supt. Badege yasabye abaturage kujya batanga amakuru ku hantu hari amakimbirane mu miryango ku nzego z’umutakano, kugira ngo hashakwe uko byakemurwa mbere y’uko bitwara ubuzima bw’abaturage.

Yabasabye kandi kujya bageza ibibazo byabo ku nzego zibishinzwe aho kujya bashaka uko babyikemurira.

Byiringiro, kuri ubu ucumbikiwe kuri sitasiyo ya Kirehe ngo iperereza rikomeze, naramuka ahamwe n’icyaha ashobora guhanishwa igifungo cya burundu; nk’uko biteganywa n’ingingo za 310 na 311 z’amategeko ahana.

Emmanuel Nshimiyimana