Uyu mwana kuri ubu urwariye mu bitaro bya Remera Rukoma, yavuye mu rugo iwabo kuwa gatandatu tariki 17/11/2012 mu masaa cyenda z’amanywa, atwawe n’umukobwa baturanye witwa Kibonke amabwira ko mama we witwa Aima amushaka.

Ababyeyi b’umwana bari batashye ubukwe, batashye ku mugoroba basanga umwana atari mu rugo, babajije abo basize mu rugo bababwira ko yagiye kwa Aima. Bagiye kumushakirayo Kibonke abahakanira ko atariwe waje kumutwara.

Bahise bitabaza umukuru w’umudugudu n’Inkeragutabara ngo bafatanye kumushakisha, maze undi mwana wo kwa Aima ababwira ko yamubonye kuri studio.

Mu masaa mbiri z’ijoro niho nyiri studio wari wibereye mu kabari, yaje kubakingurira, maze umwana wari wabuze bamusanga arambaraye kuri comptoire yahwereye bigaragara ko yanyweye umuti bashyira mu machine yandika (cartouche).

Nyiri studio witwa Musengimana Zachee, kuri ubu uri mu maboko ya Polisi, yatangaje ko urufunguzo rwa studio yari yarutije umusore w’umwogoshi (coiffeur) witwa Munyanziza Thierry ngo ajye kurebamo icyo yifubika, maze we arigendera.

Ngo nyuma Musengimana yaje kugaruka, amusabye kumukingurira undi amubwira ko atamukingurira kuko ari kumwe n’umugore we. Uyu Musengimana ngo yahise yisubirira mu kabari.

Ubwo Musengimana yazaga gukingura nyuma yo guhuruzwa n’ababyeyi b’uwo mwana, Munyanziza Thierry yari akiri muri studio. Se w’umwana yahise amufata mu ijosi, maze nyina abonye uko umwana yabaye asohoka avuza induru, umugabo arekura Thierry ajya kuramira umugore we asaba Inkeragutabara kumufata ariko Thierry arazicika ariruka.

Bamugejeje kwa muganga, bamuhaye imiti yo kumurutsa ibyo yanyweye. Aho yazanzamukiye, umwana ngo yavuze ko atazi ibyamubayeho kuko aheruka ari iwabo wa Kibonke bakaba baramuhaye icyayi n’umutobe w’imbuto, naho uko yageze muri Studio ntabyo azi.

Mu gihe Polisi igitegereje igisubizo cy’isuzuma ryo kwa muganga, iracyakusanya amakuru kuri icyo cyaha. Kuri uyu wa mbere tariki 19/11/2012 hamaze gutabwa muri yombi nyiri studio wenyine.

Marie Josee Uwiringira