Nk’uko ababonye iyi mpanuka iba babitangaza, ngo moto yaturukaga mu Majyepfo yerekeza i Kigali, itwaye abasore babiri, umwe yambaye umwenda uranga abamotari undi yambaye bisanzwe. Ubwo bageraga i Rugobagoba ku gasoko k’ubuki n’imbuto, baguranye gutwara maze uwambaye umwenda uranga abamotari aba ariwe uhekwa uwo yari atwaye aba ariwe utwara iyo pikipiki.

Nk’uko bakomeza babivuga, ngo nyuma y’iminota ibiri bavuye ku gasoko, moto yahise igongana na Coaster yari iturutse i Kigaali, maze abo basore bombi bahita bashiramo umwuka.

Umuvugizi wa Polisi mu Ntara y’amajyepfo, Superintendent Hubert Gashagaza, avuga ko bishoboka ko iyo mpanuka yatewe n’ubunyerere kuko ibyo binyabiziga byagonganye imvura irimo kugwa. Ikindi akeka ni umuvuduko ukabije wa moto, aho agira ati “Kuba moto igwa abantu bagahita bapfa, birashoboka cyane ko yari ifite umuvuduko ukabije.”

Ngo kuba abo bantu banaguranye gutwara iyo pikipiki birashoboka ko uwo wayitwaye atari umumotari yaba atari anayizi neza. Spt Gashagaza arasaba abakoresha umuhanda, batwaye ibinyabiziga kugira ubwitonzi no kwirinda ibisindisha n’umuvuduko ukabije.

Marie Josee Uwiringira